'అనుమతిస్తే కరోనాతో చనిపోయిన వారికి అంత్యక్రియలు నిర్వహిస్తాం'

అందరు ఉన్నా అనాథలుగా మిగిలేవారు కొందరు. ఎవరూలేక అనాథలుగా తనువు చాలించేవారు మరికొందరు. అలాంటి వారికి ఆత్మబంధువుగా నిలుస్తూ... అనాథ శవాలకు అంత్యక్రియలు నిర్వహిస్తూ ఆ సంస్థ తమ మానవత్వాన్ని చాటుకుంటుంది. ప్రభుత్వం అనుమతిస్తే కొవిడ్​తో చనిపోయిన వారికి సైతం అంత్యక్రియలు జరిపిస్తామంటుంది. ఇంతకీ ఆ సంస్థ ఏమిటీ? ఎక్కడుంది?

ఆదిలాబాద్‌లోని అశోక్‌ రోడ్డులో ఆరేళ్ల కిందట జరిగిన చిన్న సంఘటన ఆమెను ఓ సేవా సంస్థ ప్రారంభించేలా ప్రోత్సాహించింది. ఓ అనాథ శవాన్ని ఇద్దరు వ్యక్తులు తీసుకెళ్లడం చూసి ఆమెలో ఓ ప్రశ్న మొదలైంది.

మీరిద్దరే ఉన్నారేంటి అని అడుగ్గా... ఇది ఒక అనాథ శవం అని వారు ఇచ్చిన జవాబు ఆమెను సేవవైపు నడిపించింది. అనంతరం వారితోపాటు వెళ్లి ఆ శవానికి అంత్యక్రియలు చేసింది.

ఇప్పటివరకు...

ఆమె పేరు శశికళ. ఆదిలాబాద్​లో రెవెన్యూ ఉద్యోగిగా పని చేస్తుంది. ఆ ఘటన తరువాత ఆమె అనాథ శవాలకు అంత్యక్రియలు చేయాలని నిశ్చయించుకుంది.

అనుకున్నదే తడవుగా మానవ సేవే-మాధవ సేవ అనే ఓ స్వచ్ఛంద సంస్థను ఏర్పాటు చేసింది. ఇప్పటివరకు ఈ సంస్థ 110 అనాథ శవాలకు అంత్యక్రియలు నిర్వహించారు.

కుష్టు, ఎయిడ్స్‌ వ్యాధిగ్రస్థులకు సైతం అంత్యక్రియలు నిర్వహించి వీరు మానవత్వం చాటుకుంటారు. శవాగారంలో శవపరీక్ష... పూర్తవ్వగానే మృతదేహాలకు సొంతడబ్బులతో కొత్తబట్టలు, పూలమాలలు కొని స్మశానాలకు తరలిస్తారు. అనంతరం సంప్రదాయబద్ధంగా అంతిమ సంస్కారాలు చేస్తారు.

మరిన్ని సేవలు అందిస్తూ...

రాత్రి, పగలు తేడాలేకుండా... అనాథలకు, నిరుపేదలకు చేయూతనందిస్తున్నారు. ఈ క్రమంలో వారికయ్యే ఖర్చును సంస్థ సభ్యులే భరిస్తారు.

లాక్‌డౌన్‌ సమయంలో 68 రోజులపాటు... పునరావాస కేంద్రాల్లో ఉన్న వందలాది మంది నిరుపేదల ఆకలి తీర్చారు. చలికాలంలో దుప్పట్లు, వేసవిలో చలివేంద్రాలు నిర్వహిస్తూ... ఉదారతను చాటుకున్నారు. ప్రభుత్వం సూచిస్తే కరోనా వ్యాధిగ్రస్థులకు సైతం సేవ చేస్తామంటున్నారు.

అనాథలు, నిరుపేదలు, భిక్షాటన చేసే వారిపట్ల మానవత్వాన్ని ప్రదర్శిస్తున్న సంస్థ సేవలకు గుర్తింపుగా అధికారయంత్రాంగం వీరికి ప్రశంస పత్రాలు అందించింది.

సమయం, సందర్భంతో ప్రమేయం లేకుండా పిలిస్తే పలుకుతామన్నట్లుగా సాగుతున్న సంస్థ అందరికీ ఆదర్శంగా నిలుస్తోంది.

ఇదీ చూడండి:మీ ఇంటిని ఇలా శుభ్రపరిస్తే అలెర్జీలు దరిచేరవు!