ఒలింపిక్స్‌లో భారత హాకీ అమ్మాయిలు పతకాన్ని మించే సాధించారని కోచ్ స్జోర్డ్ మారిజ్నే తెలిపారు. దేశ ప్రజలు వారిని గుండెల్లో పెట్టుకుంటారని ఆశించారు. కాంస్య పతకానికి చేరువై ఓటమి పాలైంది. దీంతో తమ గుండె పగిలిందని కెప్టెన్‌ రాణి రాంపాల్‌ అంటోంది. ఏదేమైనా జట్టు ప్రదర్శన పట్ల గర్వపడుతున్నాని వెల్లడించింది. ప్లేఆఫ్‌ పోరులో బ్రిటన్ చేతిలో 3-4 తేడాతో టీమ్‌ఇండియా ఓడిపోయింది.
'నిజమే, ఓడినందుకు బాధగానే ఉంటుంది. మేం గెలవాల్సింది. కానీ నిజంగా ఈ అమ్మాయిలను చూసి నేను గర్వపడుతున్నా. వారు పోరాట పటిమ, నైపుణ్యాలను ప్రదర్శించారు' అని మారిజ్నే తెలిపారు.
'నేను మీ కన్నీళ్లను ఆపలేనని వారితో చెప్పాను. మాటలు వాటిని ఆపలేవు. మనం పతకం గెలవక పోయినా అంతకన్నా పెద్ద విజయమే సాధించామని చెప్పా. ప్రపంచం సరికొత్త భారత జట్టును చూసింది. అందుకు గర్వపడుతున్నా. సాధారణంగా టీమ్‌ఇండియా 2-0తో వెనకబడినప్పుడు 3-0 , 4-0తో ఓడిపోతుంటుంది. కానీ ఈసారి వారు గొప్పగా యుద్ధం చేశారు. నాలుగున్నరేళ్లుగా వారితో కలిసి పనిచేసినందుకు సంతోషంగా ఉంది. వస్తున్న స్పందనకు ఉబ్బితబ్బిబ్బు అవుతున్నా. దేశపౌరులు వారిని తమ గుండెల్లో పెట్టుకుంటారు' అని మారిజ్నే అన్నారు.
కాంస్య పతక పోరులో ఓటమి బాధ కలిగించిందని రాణి రాంపాల్‌ తెలిపింది. 2-0తో వెనకబడి స్కోరు సమం చేసి 3-2తో పుంజుకున్నామని వెల్లడించింది. విజయాన్ని సమీపించి ఓడిపోవడం వల్ల మాటలు రావడం లేదంది. కొన్నిసార్లు విజయాన్ని సమీపించడమే సరిపోదని పేర్కొంది. కాంస్య పతకం గెలవనందుకు బాధేస్తోందని తెలిపింది.