ఒలింపిక్స్​లో స్వర్ణం సాధిస్తే రూ.3 కోట్ల నజరానా

ఒలింపిక్స్​లో పతకం సాధించిన అథ్లెట్లకు భారీ నజరానా ప్రకటించింది భారతీయ రైల్వే శాఖ. రైల్వే శాఖ నుంచి విశ్వక్రీడల్లో పాల్గొన్న క్రీడాకారులు స్వర్ణం సాధిస్తే ఏకంగా రూ.3 కోట్లు పురస్కారంగా అందిస్తామని బుధవారం ప్రకటించారు అధికారులు.

టోక్యో ఒలింపిక్స్​లో పాల్గొన్న అథ్లెట్లు, కోచ్​లకు భారతీయ రైల్వేశాఖ బంపర్​ ఆఫర్​ ప్రకటించింది. రైల్వేకు చెందిన క్రీడాకారులు విశ్వక్రీడల్లో స్వర్ణ పతకం సాధిస్తేవారికిరూ.3 కోట్ల రివార్డు ఇవ్వనున్నట్లు బుధవారం వెల్లడించింది.

"టోక్యో ఒలింపిక్స్​లో పాల్గొన్న భారత రైల్వే క్రీడాకారులు, కోచ్​లలో ధైర్యాన్ని ప్రోత్సహించేందుకు ప్రత్యేక నగదు పురస్కారాలను ప్రకటిస్తున్నాం. విశ్వక్రీడల్లో బంగారు పతక విజేతలకు రూ.3 కోట్లు, రజత పతకానికి రూ.2 కోట్లు, కాంస్య పతకానికి రూ.1 కోటి నగదు రూపంలో రైల్వే అథ్లెట్లకు అందించనున్నాం. అదే విధంగా చివరి 8 స్థానాల్లో నిలిస్తే రూ.35 లక్షలను ప్రోత్సాహకంగా అందిచనున్నాం. ఒలింపిక్స్​లో పాల్గొన్న ప్రతి అథ్లెట్​కు రూ.7.5 లక్షలు పురస్కారంగా అందజేస్తాం".

- భారతీయ రైల్వేశాఖ ప్రకటన

బంగారు పతక విజేతల కోచ్​లకు రూ.25 లక్షలు, సిల్వర్​ రూ.20 లక్షలు, కాంస్య పతక విజేతల కోచ్​లకు రూ.15 లక్షలను బహుమానంగా ఇవ్వనున్నాం. మిగిలిన కోచ్​లకు రూ.7.5 లక్షలు అందజేయనున్నట్లు రైల్వే శాఖ ప్రకటనలో తెలిపింది. ఒలింపిక్స్​లో రైల్వే శాఖ నుంచి 25 మంది అథ్లెట్లు, ఐదుగురు కోచ్​లతో పాటు ఓ ఫిజియో ప్రాతినిధ్యం వహిస్తున్నారు.

ఇదీ చూడండి..Tokyo Olympics: మేరీ కోమ్, సింధు రాణిస్తారా?