టోక్యో ఒలింపిక్స్ వెయిట్లిఫ్టింగ్లో రజతం గెలుచుకున్న మీరాబాయి చాను.. సోమవారం దేశానికి తిరిగివచ్చింది. దిల్లీ ఎయిర్పోర్టులో ఆమెకు ఘనస్వాగతం లభించింది. అధికారులు ఆమె కోసం భారీ భద్రతను ఏర్పాటు చేశారు. దిల్లీ ఎయిర్పోర్ట్లో ఆమెకు ఆర్టీ-పీసీఆర్ పరీక్షలు నిర్వహించారు.
"టోక్యో ఒలింపిక్స్కు ముందు అమెరికాలో శిక్షణ తీసుకోవాలని నిర్ణయించుకున్నాను. కానీ, కరోనా మహమ్మారి వల్ల అక్కడికి చేరుకోవడం కష్టంగా మారింది. స్పోర్ట్స్ అథారిటీ ఆఫ్ ఇండియాతో పాటు ప్రధాని మోదీ నాకు ఈ విషయంలో సాయం చేశారు. యూఎస్ చేరుకోవడానికి కావాల్సిన టికెట్లు ఇచ్చారు. అమెరికాలో శిక్షణకు సంబంధించి వారెంతో మద్దతుగా నిలిచారు. నేను అనుకున్న విధంగా నాకు ట్రైనింగ్ లభించింది. నాకు మద్దతుగా నిలిచిన వారందరికీ ధన్యవాదాలు. టార్గెట్ ఒలింపిక్ పోడియం స్కీమ్ కూడా నాకెంతో తోడ్పడింది. నా శక్తి సామర్థ్యాలను వెలికి తీసింది."
-మీరాబాయి చాను, భారత రెజ్లర్.
"ఈవెంట్కు ఒక్క రోజు ముందు చాలా టెన్షన్ పడ్డాను. ప్రతి భారతీయుడు మీరాబాయి పతకం గెలవాలని కోరుకుంటాడు. నేను నా కోచ్ విజయ్ శర్మ ఐదేళ్లుగా ఈ క్షణం కోసం ఎదురుచూశాము. నా లక్ష్యం కోసం ప్రతి దాన్ని త్యాగం చేశాము. రియోలో విఫలమైన తర్వాత ఈసారి అలా జరగకూడదని అనుకున్నాను. అందుకే నాపై ఒత్తిడి నెలకొంది. మేము పడిన కష్టానికి నేడు ఫలితం దక్కింది" అని మీరాబాయి పేర్కొంది.
49 కేజీల విభాగంలో బరిలో దిగిన మీరాబాయి మొత్తంగా 202 కేజీలు ఎత్తి సిల్వర్ మెడల్ గెలుచుకుంది. దీంతో టోక్యో ఒలింపిక్స్లో భారత్ ఖాతా తెరిచింది.
ఏఎస్పీగా..
టోక్యో ఒలింపిక్స్లో సిల్వర్ మెడల్తో భారత కీర్తి పతాకాన్ని ఎగరేసిన చానుకు.. ఇప్పటికే సొంత రాష్ట్రమైన మణిపూర్ సీఎం బీరేన్ సింగ్ కోటి రూపాయల నగదు పురస్కారం ప్రకటించారు. అయితే స్వదేశానికి రాగానే మరో సర్ప్రైజ్ ఇస్తామని చెప్పారాయన. తాజాగా చానుకు అడిషనల్ సూపరిండెంట్ ఆఫ్ పోలీస్ (ఏఎస్పీ)గా ఉద్యోగం ఇస్తున్నట్లు వెల్లడించింది మణిపూర్ ప్రభుత్వం.
