'మహిళలూ.. దేశం మీ వెంటే ఉంది'

టోక్యో ఒలింపిక్స్​లో భాగంగా సోమవారం జరిగిన క్వార్టర్స్​లో మహిళల హాకీ జట్టు విజయం సాధించి సెమీస్​లోకి దూసుకెళ్లింది. దీంతో జట్టుపై పలువురు క్రీడా ప్రముఖులు సామాజిక మాధ్యమాల ద్వారా ప్రశంసలు కురిపించారు. ఈ జట్టు పతకం సాధిస్తుందని పలువురు ఆశాభావం వ్యక్తం చేశారు.

టోక్యో ఒలింపిక్స్​లో సోమవారం జరిగిన హాకీ క్వార్టర్స్​లో భారత మహిళల జట్టు.. ప్రపంచ నంబరు.2 జట్టైన ఆస్ట్రేలియాపై 1-0 తేడాతో గెలుపొంది.. సెమీఫైనల్​కు చేరింది. విశ్వక్రీడల్లో భారత మహిళా హకీ జట్టు సెమీఫైనల్​కు చేరడం ఇదే తొలిసారి. 1980 మాస్కోలో జరిగిన విశ్వక్రీడల్లో అత్యుత్తమ ప్రదర్శన చేసి నాలుగో స్థానంలో నిలిచింది. ఇన్నేళ్ల తర్వాత మెగాక్రీడల్లో మళ్లీ ఆ స్థాయిలో ప్రదర్శన చేయడం విశేషం. దీంతో సామాన్యుల నుంచి ప్రముఖుల వరకు హాకీ జట్టుపై ప్రశంసలు కురిపిస్తున్నారు. సామాజిక మాధ్యమాల ద్వారా తమకున్న అభిమానాన్ని చాటుకుంటున్నారు. పొగడ్తలతో ముంచెత్తుతున్నారు.

"ఈ ఆటలో భారత జట్టు ఎక్కడా తగ్గలేదు. జోరు ప్రదర్శిస్తూనే ఉంది. ఆస్ట్రేలియా జట్టుకు దిక్కుతోచని పరిస్థితి ఏర్పడింది. ఈ ఘనతంతా డిఫెన్స్​, గోల్​ కీపర్​కు చెందుతుంది. పతకం గెలవడానికి చాలా దగ్గరగా ఉన్నాం. గతంలో హాకీలో జట్టు స్వర్ణం సాధించింది. ఈ సారి కూడా సాధిస్తుందని ఆశిద్దాం. ఆల్​ ది బెస్ట్​."

-అశోక్​ ధ్యాన్​ చంద్​, మాజీ హాకీ కెప్టెన్​.

అశోక్​ ధ్యాన్​ చంద్

"అద్భుత ప్రదర్శన.. టోక్యో ఒలింపిక్స్​ 2020లో టీమ్​ఇండియా చరిత్ర సృష్టించింది. జట్టుకు నా అభినందనలు. ఆస్ట్రేలియాపై నెగ్గి విశ్వక్రీడల్లో తొలిసారి సెమీఫైనల్స్​కు చేరుకున్నాం. మహిళలు.. మీ వెన్నంటే మేము ఉన్నాము."

-అనురాగ్​ ఠాకుర్​, కేంద్ర క్రీడా శాఖ మంత్రి.

"భారత కల నెరవేరబోతోంది! మన మహిళ హాకీ జట్టు ఆస్ట్రేలియాను ఓడించింది. ఈ ఒలింపిక్స్​లో పురుషులు, మహిళల హాకీ జట్లు.. రెండూ సెమీస్​కు చేరుకున్నాయి. నా సంతోషం, ఉత్సాహాన్ని వర్ణించడానికి మాటలు కూడా రావట్లేదు."

-కిరణ్​ రిజిజు, మాజీ క్రీడాశాఖ మంత్రి, ప్రస్తుత కేంద్ర న్యాయ శాఖ మంత్రి.

ఈ మ్యాచ్​లో 22వ నిమిషం వద్ద భారత క్రీడాకారిణి గుర్జిత్​ కౌర్ గోల్​ చేసింది. ఆ తర్వాత మ్యాచ్​లో ఆద్యంతం దూకుడు ప్రదర్శించిన రాణి రాంపాల్​సేన.. ప్రత్యర్థిని ఖాతా తెరవనీయకుండా అడ్డుకోగలిగింది. ఇక గోల్​ కీపర్​ సవితా పునియా.. ఆస్ట్రేలియా చేసిన ప్రయత్నాలను 9 సార్లు నిలువరించింది. ఈ విజయంలో ఎక్కువ శాతం ఘనత ఆమెకే చెందుతుంది. బుధవారం(ఆగస్టు 4) జరగనున్న సెమీఫైనల్​లో అర్జెంటీనాతో భారత మహిళా హకీ జట్టు తలపడనుంది.

అంతకుముందు భారత పురుషుల హాకీ జట్టు.. సెమీస్​లోకి దూసుకెళ్లింది. దాదాపు ఐదు దశాబ్దాల తర్వాత ఈ ఘనత సాధించింది. గ్రేట్​ బ్రిటన్​తో ఆదివారం జరిగిన క్వార్టర్స్​ ఫైనల్​ మ్యాచ్​లో 3-1 తేడాతో గెలిచింది. మంగళవారం(ఆగస్టు 3) సెమీస్​లో బెల్జియంతో తలపడనుంది.

ఇదీ చూడండి: దుమ్మురేపిన మహిళల హాకీ జట్టు.. క్వార్టర్స్​లో విజయం