టోక్యో ఒలింపిక్స్ నుంచి దేశానికి వట్టి చేతులతో తిరిగివచ్చినందుకు బాధగా ఉందని తెలిపింది దిగ్గజ బాక్సర్ మేరీకోమ్. ప్రజల నుంచి తనకు చాలా మద్దతు లభించిందని.. కానీ పతకం గెలవలేకపోయినందుకు దేశానికి క్షమాపణలు చెబుతున్నట్టు పేర్కొంది. టోక్యో నుంచి భారత్కు శనివారం చేరుకున్న మేరీకోమ్.. దిల్లీ విమానాశ్రయంలో ఈ వ్యాఖ్యలు చేసింది.
"పతకం తీసుకురాకుండా వెనక్కి వచ్చినందుకు బాధగా ఉంది. మెడల్తో ఇండియాకు వద్దామనుకున్నా. నాకు ప్రజల మద్దతు లభించింది. ఆ మ్యాచ్లో(రౌండ్ 16) నేను మొదటి రెండు రౌండ్లు గెలిచా. అయినా నేను ఓడిపోయానని ప్రకటించారు. మరి నేను ఎలా ఓడిపోయినట్టు? ఇది మోసపూరిత నిర్ణయం. ఫలితాన్ని తారుమారు చేశారు. దేశానికి క్షమాపణలు చేప్పాలనుకుంటున్నా."
-మేరీకోమ్, దిగ్గజ బాక్సర్.
దేశానికి కచ్చితంగా పతకం తీసుకొస్తుందనుకున్న మేరీకోమ్.. మహిళల 51 కేజీల విభాగంలో కొలంబియా బాక్సర్ వాలెన్సియాతో జరిగిన పోరులో 2-3 తేడాతో ఓడిపోయింది. ఫలితంగా ఒలింపిక్స్ నుంచి నిష్క్రమించింది.
బౌట్కు కొద్ది నిమిషాల ముందు జెర్సీ మార్చుకోవాలని అధికారులు తనకు చెప్పినట్టు మేరీకోమ్ తెలిపింది. అంతకుముందు మ్యాచ్లో అదే జెర్సీతో బరిలో దిగినప్పుడు ఎవరూ ఏమీ అనలేదని.. ఆ మ్యాచ్లోనే ఎందుకు ఆదేశాలిచ్చారని ప్రశ్నించింది మేరీకోమ్. ఇలా మరే దేశానికీ జరగలేదని పేర్కొంది. ఇది కచ్చితంగా మానసిక క్షోభకు గురిచేయడమేనని మండిపడింది.
తదుపరి మ్యాచ్లపై ఓ రిపోర్టర్ అడిగిన ప్రశ్నకు.. 'కచ్చితంగా ఆడతాను.. ఎందుకు ఆడకూడదు? నాకు వయసు ఉంది. 40 వరకు ఆడగలను' అని జవాబిచ్చింది సీనియర్ క్రీడాకారిణి.
ఇదీ చూడండి:-Tokyo Olympics: సెమీస్లో సింధు ఓటమి.. స్వర్ణం ఆశలు ఆవిరి
