టోక్యో ఒలింపిక్స్లో ఐదో రోజూ భారత బృందం నుంచి మిశ్రమ ఫలితాలు వచ్చాయి. హాకీ, బాక్సింగ్, బ్యాడ్మింటన్లో విజయాలు నమోదు కాగా.. షూటింగ్, టీటీ ఈవెంట్లలో ఘోరంగా విఫలమయ్యారు భారత అథ్లెట్లు.
మంగళవారం ఫలితాలు ఇవే..
ఊరించి.. నిరాశ పరిచి..
10మీ. ఎయిర్ పిస్టల్ మిక్స్డ్ టీమ్ విభాగంలో క్వాలిఫికేషన్ స్టేజీ 1లో భారత జోడీ ఆశలు రేపింది. మను-సౌరభ్ దూకుడుగా పాయింట్లు సాధించారు. 582 పాయింట్లతో ఏకంగా అగ్రస్థానంలో నిలిచారు. ఇంకేముంది మరో క్వాలిఫికేషన్ రౌండ్లో టాప్-4లో నిలిస్తే చాలు ఏదో పతకం ఖాయమనుకుంది యావత్ భారతావని.
కానీ, అంతలోనే తేలిపోయారు భారత షూటర్లు. క్వాలిఫికేషన్ స్టేజీ 2లో విఫలమయ్యారు. 400 పాయింట్లకు గానూ 380 మాత్రమే సాధించింది మను-సౌరభ్ జంట. తొలి సిరీస్లో ఈ ద్వయం 188 పాయింట్లు.. రెండో సిరీస్లో 192 పాయింట్లు జోడించింది. దీంతో ఫైనల్కు అర్హత సాధించలేకపోయింది. మొత్తంగా తుది ఎనిమిది మందిలో ఏడో స్థానంలో నిలిచింది. దీంతో పతకం దక్కుతుందనుకున్న ఈవెంట్లోనూ ఆశలు అడియాశలయ్యాయి.
ఇదే విభాగంలో పాల్గొన్న మరో భారత జంట యశస్విని- అభిషేక్ వర్మ జోడీ కూడా నిరాశపరిచింది. ఈ ఈవెంట్లో 17వ స్థానంతో సరిపెట్టుకుంది.
రైఫిల్స్లోనూ..
10మీ. ఎయిర్ రైఫిల్స్ మిక్స్డ్ టీమ్ విభాగంలోనూ భారత షూటర్లు మెడల్ మ్యాచ్కు అర్హత సాధించలేకపోయారు. వలరివన్- దివ్యాన్ష్ జోడీ 12వ స్థానంలో నిలవగా.. అంజుమ్ దీపక్ జోడీ 18వ స్థానంతో సరిపెట్టుకుంది.
హాకీలో సత్తా..
మంగళవారం ఆటలో చెప్పుకోదగ్గ ప్రదర్శన చేసింది భారత పురుషుల జట్టు. హాకీలో మన్ప్రీత్ సేన అదరగొట్టింది. స్పెయిన్తో జరిగిన మ్యాచ్లో 3-0తో గెలిచి క్వార్టర్స్ అవకాశాలు మెరుగుపర్చుకుంది. ఇప్పటివరకు 3 మ్యాచ్లు ఆడిన ఇండియా.. రెండింటిలో విజయం సాధించింది. తదుపరి అర్జెంటీనా, జపాన్తో తలపడనుంది.
తాజా మ్యాచ్లో రూపిందర్పాల్ సింగ్ రెండు గోల్స్తో ఆకట్టుకోగా.. సిమ్రన్జీత్ సింగ్ 13వ నిమిషంలో భారత్కు తొలి గోల్ను అందించాడు. 15వ నిమిషంలో పెనాల్టీ స్ట్రోక్ను సద్వినియోగం చేసుకుని రూపిందర్ రెండో గోల్ చేశాడు. చివరి క్వార్టర్లో మరో గోల్తో మొత్తం ఆధిక్యాన్ని మూడుకు పెంచాడు. తొలి మ్యాచ్లో న్యూజిలాండ్పై 3-2 తేడాతో గెలిచిన మన్ప్రీత్ సేన, ఆ తర్వాత ఆసీస్ చేతిలో 7-1 తేడాతో చిత్తయింది.
ఇదీ చదవండి:C. A. Bhavani Devi: 'అమ్మ నగలమ్మి ఫెన్సింగ్ కిట్ కొన్నా'
టీటీలో శరత్కు ఓటమి..
టేబుల్ టెన్నిస్లో భారత్ కథ ముగిసింది. పురుషుల సింగిల్స్ రౌండ్ 3లో ఆచంట శరత్ కమల్ ఓటమి చెందాడు. చైనా ఆటగాడు మా లాంగ్ చేతిలో 4-1(11-7, 8-11, 13011, 11-4, 11-4) తేడాతో పరాజయం పాలయ్యాడు. తొలి రెండు గేముల్లో కనీస పోరాటం చూపిన కమల్.. తర్వాత పూర్తిగా చేతులెత్తేశాడు.
తొలి గేమ్ను 7-11తో ప్రత్యర్థి గెలుపొందగా.. 11-8తో రెండో గేమ్లో ఆధిక్యంలోకి వచ్చాడు కమల్. మూడో రౌండ్ హోరాహోరీగా సాగినప్పటికీ ప్రత్యర్థి ముందు నిలవలేకపోయాడు భారత ఆటగాడు. వరుసగా చివరి మూడు రౌండ్లు గెలిచిన మా లాంగ్ విజేతగా నిలిచాడు.
బ్యాడ్మింటన్..
సాత్విక్- చిరాగ్ జోడీ.. గ్రేట్ బ్రిటన్ వెండీ-లేన్ జంటపై 21-17, 21-19 తేడాతో వరుస సెట్లలో విజయం సాధించింది. అయినప్పటికీ క్వార్టర్స్కు అర్హత సాధించలేకపోయింది. గ్రూప్-ఏలో పాయింట్ల పట్టికలో ఇండోనేసియా, చైనీస్ తైపీ మెరుగైన స్థానాల్లో ఉండటమే ఇందుకు కారణం.
మొత్తంగా మూడు మ్యాచ్లు ఆడిన భారత డబుల్స్ జోడీ తొలి మ్యాచ్లో చైనీస్ తైపీని 21-16, 16-21, 27-25 తేడాతో ఓడించింది. ఇండోనేసియాతో జరిగిన రెండో మ్యాచ్లో 21-13, 21-12తో ఓడిపోయింది భారత ద్వయం.
బాక్సింగ్లో మెరిసిన లవ్లీనా..
మహిళల 69 కేజీల విభాగంలో జర్మనీ బాక్సర్ నదైన్ అపెట్జ్పై 3-2 తేడాతో గెలుపొందింది భారత బాక్సర్ లవ్లీనా. ఆమె తదుపరి శుక్రవారం జరిగే రెండో క్వార్టర్స్లో చైనీస్ తైపీ బాక్సర్ చెన్ నీన్ చిన్తో తలపడనుంది.
ఇదీ చదవండి:Tokyo Olympics: వీరు బరిలో దిగితే గురి తప్పదంతే..
