టాప్‌ సీడ్‌ ఆష్లే బార్టీ (ఆస్ట్రేలియా) వింబుల్డన్ మహిళల సింగిల్స్‌ సెమీఫైనల్లో అడుగుపెట్టింది. తిరుగులేని ఆధిపత్యాన్ని ప్రదర్శించిన ఆమె క్వార్టర్‌ఫైనల్లో 6-1, 6-3తో తొమ్లనోవిచ్‌ (ఆస్ట్రేలియా)ను చిత్తుగా ఓడించింది. బార్టీ 5 ఏస్‌లు, 23 విన్నర్లు కొట్టింది. రెండో సీడ్‌ సబలెంక కూడా సెమీస్లో చోటు సంపాదించింది. క్వార్టర్‌ఫైనల్లో ఆమె 6-4, 6-3తో జబేర్‌ (ట్యునీషియా)పై విజయం సాధించింది. సబలెంక 3 ఏస్‌లు, 27 విన్నర్లు కొట్టింది. జబేర్‌ 4 డబుల్‌ ఫాల్ట్‌లు చేసింది.
మరో క్వార్టర్స్లో ఎనిమిదో సీడ్‌ ప్లిస్కోవా (చెక్‌) 6-2, 6-2తో అన్‌ సీడెడ్‌ విక్టోరియా గోల్బిచ్‌ (స్విట్జర్లాండ్‌)ను అలవోకగా ఓడించింది. ప్లిస్కోవా తన సర్వీసులో కేవలం 13 పాయింట్లు కోల్పోయింది. వింబుల్డన్ సెమీస్ చేరడం ఆమెకు ఇదే తొలిసారి. మాజీ నంబర్‌వన్‌ కెర్బర్‌ (జర్మనీ) కూడా సెమీఫైనల్‌కు దూసుకెళ్లింది. క్వార్టర్స్లో ఆమె 6-2, 6-3తో ముచోవా (చెక్‌)పై విజయం సాధించింది. సెమీస్లో కెర్బర్‌తో బార్టీ, ప్లిస్కోవాతో సబలెంక తలపడతారు.