ప్రపంచంలోనే అత్యధికంగా ఆర్జిస్తున్న మహిళా అథ్లెట్గా జపాన్‌కు చెందిన టెన్నిస్ క్రీడాకారిణి నవోమి ఒసాకా నిలిచింది. దీంతో అమెరికన్‌ దిగ్గజం సెరెనా విలియమ్స్ను ఆమె వెనక్కినెట్టి తొలిస్థానానికి చేరింది. గత పన్నెండు నెలల సంపాదన ఆధారంగా ఫోర్బ్స్‌ మ్యాగజీన్‌ ప్రకటించిన జాబితాలో రూ.284.15 కోట్లతో (37.4 మిలియన్‌ డాలర్లు) అగ్రస్థానంలో నిలిచిందీ జపాన్ క్రీడాకారిణి. ఎండార్సుమెంట్లు, ప్రైజ్‌మనీ రూపంలో సెరెనా కంటే రూ.10.64 కోట్లు (1.4 మిలియన్‌ డాలర్లు) ఎక్కువగా సంపాదించింది. నాలుగేళ్లుగా టాప్లో కొనసాగుతున్న సెరెనా విలియమ్స్కు చెక్ పెట్టింది.
ఒసాకా ఇప్పటివరకు రెండు గ్రాండ్‌స్లామ్‌ టైటిళ్లు గెలుపొందింది. ఇప్పటివరకు రష్యా క్రీడాకారిణి షరపోవా పేరుతో ఉన్న రికార్డును ఆమె అధిగమించింది. షరపోవా 2015లో 29.7 మిలియన్‌ డాలర్లు సంపాదించింది.