యూఎస్ ఓపెన్​లో సెరెనా విలియమ్స్ 'సెంచరీ'

ఆరుసార్లు యుఎస్​ ఓపెన్​ విజేత సెరెనా విలియమ్స్​.. ఈ టోర్నీలో 100వ విజయాన్ని నమోదు చేసి  రికార్డు సృష్టించింది. ఇందులో టైటిల్​ గెలిస్తే అత్యధిక గ్రాండ్​స్లామ్​లు గెలిచిన ప్లేయర్​గా మార్గరెట్​ కోర్ట్ సరసన నిలుస్తుంది.​

అమెరికన్ టెన్నిస్​ దిగ్గజం సెరెనా విలియమ్స్​.. యుఎస్​ ఓపెన్​లో మరో రికార్డు నెలకొల్పింది. క్వార్టర్స్​లో చైనాకు చెందిన వాంగ్​ క్వియాంగ్​పై 6-1, 6-0 తేడాతో గెలిచి, ఈ టోర్నీలో 100వ విజయాన్ని నమోదు చేసింది. ఏకపక్షంగా సాగిన ఈ పోరును 44 నిమిషాల్లోనే ముగించింది. యూఎస్ ఓపెన్​లో అత్యధిక మ్యాచ్​లు గెలిచిన మాజీ టెన్నిస్ ప్లేయర్ క్రిస్ ఎవార్ట్​ సరసన నిలిచింది. అనంతరం మాట్లాడిన సెరెనా.. ఈ గెలుపును నమ్మలేకపోతున్నానంటూ ఆనందం వ్యక్తం చేసింది.

"ఈ విషయాన్ని నిజంగా నమ్మలేకపోతున్నా. 16ఏళ్ల వయసులో ఆట మెుదలుపెట్టడమే గుర్తుంది. అప్పుడే 100 మ్యాచ్​లు గెలిచానంటే ఆశ్చర్యంగా ఉంది. గెలిస్తే ముందుకు వెళ్తా, లేకపోతే ఇంటికి వెళ్తా అని తెలుసు. అయితే నేను ఓడిపోవడానికి సిద్ధంగా లేను". -సెరెనా విలియమ్స్​, టెన్నిస్​ క్రీడాకారిణి​

సెరెనా.. ఉక్రెయిన్​కు చెందిన ఎలీనా స్వెతలోనాతోసెమీస్​లో తలపడనుంది. గత కొంతకాలంగా గాయంతో బాధపడుతున్న ఈ ప్లేయర్.. యూఎస్ ఓపెన్​లో మాత్రం ఆకట్టుకునే ప్రదర్శన చేస్తోంది.