ఫ్రెంచ్ ఓపెన్- 2019లో రఫెల్ నాదల్ మరోసారి సత్తాచాటాడు. చిరకాల ప్రత్యర్థి రోజర్ ఫెదరర్పై సెమీస్లో గెలిచి ఫైనల్కు దూసుకెళ్లాడు. 6-3, 6-4, 6-2 తేడాతో స్విస్ దిగ్గజంపై విజయం సాధించాడు రఫా. ఫ్రెంచ్ ఓపెన్లో వరుసగా 22వ మ్యాచ్ గెలిచాడీ స్పెయిన్ బుల్.
పురుషుల సింగిల్స్ సెమీస్లో తొలి సెట్ను సులభంగా గెలిచాడు నాదల్ . రెండో సెట్లో ఫెదరర్ గట్టి పోటినిచ్చాడు. అయితే నాదల్ పట్టువదలకుండా ఆడి రెండో సెట్లోనూ విజయం సాధించాడు. మూడో సెట్ ఏకపక్షంగా సాగింది. వరుస పాయింట్లు సాధించి మ్యాచ్ సొంతం చేసుకున్నాడు రఫా.
మట్టి కోర్టులో తనకు తిరుగులేదని మరోసారి నిరూపించాడు రఫెల్. ఇప్పటివరకు 11 సార్లు ఫ్రెంచ్ ఓపెన్ విజేతగా నిలిచిన ఈ డిఫెండింగ్ ఛాంపియన్ 12వ టైటిల్పై గురిపెట్టాడు. మరో సెమీస్ మ్యాచ్ జకోవిచ్ - థీమ్కు మధ్య జరుగుతోంది. ఇందులో గెలిచినవారిపై తుదిపోరులో తలపడనున్నాడు రఫా.