లండన్ వేదికగా ప్రారంభమైన వింబుల్డన్లో తొలిరోజు ఊహించని ఫలితాలు ఎదురయ్యాయి. టైటిల్ ఫేవరెట్లుగా బరిలోకి దిగిన క్రీడాకారిణులు టోర్నీ మొదటి రౌండ్లోనే నిష్క్రమించారు.
ప్రపంచ నెంబర్-2 నవోమి ఒసాకా(జపాన్) తొలి రౌండ్నే ఛేదించలేకపోయింది. సోమవారం జరిగిన పోరులో పుతిన్త్సెవా(కజకిస్థాన్) 7-4, 6-2తో ఒసాకాను ఓడించింది.
ఛాంపియన్కు షాక్...
పిన్న వయసులోనే వింబుల్డన్ మెయిన్‌ డ్రాకు అర్హత సాధించి చరిత్ర సృష్టించిన అమెరికా యువక్రీడాకారిణి 15 ఏళ్ల కోరి గాఫ్... గ్రాండ్‌స్లామ్‌ టోర్నీలో అద్భుత విజయం సొంతం చేసుకుంది. 39 ఏళ్ల వీనస్ విలియమ్స్‌కు తొలి రౌండ్లోనే షాకిచ్చింది. ఐదుసార్లు ఛాంపియన్ వీనస్ విలియమ్స్ను సోమవారం జరిగిన పోరులో 6-4, 6-4 తేడాతో మట్టికరిపించింది గాఫ్. 1991 తర్వాత వింబుల్డన్లో తొలి రౌండ్ నెగ్గిన పిన్న వయస్కురాలిగానూ కోరి గాఫ్ ఘనత సాధించింది.
ఏడో సీడ్ హలెప్(రొమేనియా), మూడో సీడ్ ప్లిస్కోవా(చెక్ రిపబ్లిక్) శుభారంభం చేశారు. మొదటి రౌండ్లో హలెప్ 6-4, 7-5తో సస్నోవిచ్ (బెలారస్)పై నెగ్గింది. ప్లిస్కోవా 6-2, 7-4తో లిన్ జు (చైనా)ను ఓడించింది. స్వితోలినా(ఉక్రెయిన్), మాడిసన్ కీస్(అమెరికా), రిబరికోవా(స్లొవేకియా), సెవత్సొవా(లాత్వియా)రెండో రౌండ్లో అడుగుపెట్టారు.