'కరోనా విజృంభిస్తుంటే ఒలింపిక్స్​ అవసరమా?'

కరోనా నేపథ్యంలో ఒలింపిక్స్​ నిర్వహణ వల్ల కలిగే నష్టాల గురించి విస్తృత చర్చ అవసరమని టెన్నిస్ స్టార్​ నవోమి ఒసాకా అభిప్రాయపడింది. జపాన్​లోకి చాలామంది ప్రవేశించనున్నారని.. కాబట్టి ప్రజలు మరింత సురక్షితంగా ఉండాలని సూచించింది.

రోజురోజుకు కొవిడ్ విజృంభిస్తున్న నేపథ్యంలో టోక్యో ఒలింపిక్స్​ నిర్వహణలో జాగ్రత్తగా ఉండాలని సూచించింది టెన్నిస్​ స్టార్​ నవోమి ఒసాకా. ఆటల నిర్వహణ వల్ల కలిగే నష్టాల గురించి విస్తృతమైన చర్చ అవసరమని ఆమె పేర్కొంది. ఇలాంటి పరిస్థితుల్లో ఒలింపిక్స్​ అవసరమా అనే అభిప్రాయాన్ని ఆమె వ్యక్తం చేసింది.

"ఒలింపిక్స్​ జరగాలని నేను కోరుకుంటున్నాను. కరోనా నేపథ్యంలో గత సంవత్సర కాలంగా చాలా మార్పులు జరిగాయి. ఊహించని పరిణామాలు చోటు చేసుకుంటున్నాయి. కొవిడ్..​ ప్రజలను అసౌకర్యానికి గురిచేస్తుంది. ఒలింపిక్స్​ నిర్వహణ వల్ల ప్రజా జీవితం ప్రమాదంలో పడుతుందని నేను భావిస్తున్నాను. కాబట్టి దీనిపై చర్చ అవసరం."

-నవోమి ఒసాకా, టెన్నిస్ క్రీడాకారిణి.

"గతేడాది జరగాల్సిన ఒలింపిక్స్​ కొవిడ్ కారణంగా వాయిదా పడ్డాయి. ఈ సారి కూడా ఆటల నిర్వహణపై జపాన్​ ప్రజల్లో వ్యతిరేకత ఉంది. దేశంలో కేవలం 2 శాతం ప్రజలు మాత్రమే టీకా తీసుకున్నారు. అయినప్పటికీ.. నిర్ణీత తేదీ ప్రకారమే ఆటలు ప్రారంభించాలని స్థానిక నిర్వాహకులతో పాటు ఒలింపిక్ కమిటీ పట్టుబడుతున్నాయి" అని ఒసాకా తెలిపింది.

ఒలింపిక్స్​ కారణంగా జపాన్​లోకి చాలా మంది రాబోతున్నారని ఒసాకా తెలిపింది. కాబట్టి ఇక్కడి ప్రజలు మరింత సురక్షితంగా ఉండాలని అభిప్రాయపడింది. ఇప్పటికే తాను టీకా తీసుకున్నట్లు వెల్లడించింది. వ్యాక్సినేషన్​ కోసం ఏ ఒక్కరినీ బలవంత పెట్టలేమని తెలిపింది.

ఇదీ చూడండి:నాదల్, ఒసాకాను వరించిన ప్రతిష్ఠాత్మక లారస్​ అవార్డు