ఆటతో కాక నిర్లక్ష్యంతో యూఎస్‌ ఓపెన్ నుంచి నిష్క్రమించిన సెర్బియా స్టార్ నొవాక్‌ జకోవిక్ మరోసారి తన అసహనంతో చైర్ అంపైర్ హెచ్చరికలకు గురయ్యాడు. ఇటాలియన్ ఓపెన్లో ఈ ఘటన జరిగింది. శనివారం జరిగిన పురుషుల సింగిల్స్‌ క్వార్టర్స్లో 6-3, 4-6, 6-3తో జర్మనీ క్వాలిఫయర్‌ డొమినిక్‌ కొప్‌ఫర్‌పై కష్టపడి గెలిచి సెమీస్ చేరిన జకో.. మ్యాచ్ జరుగుతున్న సమయంలో భావోద్వేగాలను నియంత్రించుకోలేకపోయాడు.
చైర్ అంపైర్ ఆగ్రహానికి గురైన జకోవిక్
మరోసారి తన అసహనంతో చైర్ అంపైర్ ఆగ్రహానికి గురయ్యాడు టెన్నిస్ స్టార్ జకోవిక్. ఇటాలియన్ ఓపెన్ క్వార్టర్స్లో ఈ ఘటన చోటు చేసుకుంది. ఈ మ్యాచ్లో గెలిచిన జకో సెమీస్ చేరాడు.
చైర్ అంపైర్ ఆగ్రహానికి గురైన జకోవిక్
రెండో సెట్లో తన సర్వీస్‌ బ్రేక్‌ అయి స్కోరు 3-3తో సమానంగా ఉన్నప్పుడు ఆగ్రహంతో ఊగిపోయిన నొవాక్‌.. రాకెట్‌ను నేలకేసి కొట్టి విరగ్గొట్టాడు. దీంతో అతనిని చైర్ అంపైర్ హెచ్చరించాడు. ఈ టోర్నీ ప్రిక్వార్టర్స్‌లోనూ జకో ఇలాగే ప్రవర్తించాడు. యూఎస్‌ ఓపెన్లో జకో నిర్లక్ష్యంగా బంతిని కొట్టడం వల్ల అది లైన్‌ అంపైర్‌కు తగిలింది. దీంతో జకోను టోర్నీ నుంచి తప్పించారు .
కాగా మహిళల సింగిల్స్‌లో సిమోనా హలెప్‌ సెమీఫైనల్లో ప్రవేశించింది. యులినా పుతిన్‌త్సెవా (కజకిస్థాన్‌)తో మహిళల సింగిల్స్‌ క్వార్టర్స్లో 6-2, 2-0తో టాప్‌ సీడ్‌ సిమోనా ఆధిక్యంలో ఉన్న సమయంలో ప్రత్యర్థి గాయం కారణంగా తప్పుకోవడం వల్ల ఆమె ముందంజ వేసింది. పురుషుల డబుల్స్‌ క్వార్టర్‌ఫైనల్లో బోపన్న-డెన్నిస్‌ షపవ్‌లోవ్‌ (కెనడా) 6-4, 5-7, 7-10తో జెరెమీ చార్డీ-ఫాబ్రిస్‌ మార్టిన్‌ (ఫ్రాన్స్‌) చేతిలో పోరాడి ఓడారు.