తిరుగులేని జకో... డబుల్స్​లో భారత్​కు షాక్​

ఫ్రెంచ్​ ఓపెన్​ పురుషుల సింగిల్స్‌లో టాప్‌ సీడ్‌ నొవాక్‌ జకోవిచ్‌ దూసుకెళుతున్నాడు. మూడో రౌండ్లో నొవాక్‌ ఇటలీ క్రీడాకారుడు కారుసో పై విజయం సాధించాడు. మరోవైపు డబుల్స్​ విభాగంలో లియాండర్​ పేస్ ఓడిపోయి​ ఇంటిముఖం పట్టాడు.

ఫ్రెంచ్​ ఓపెన్​ పురుషుల సింగిల్స్‌లో టాప్‌ సీడ్‌ నొవాక్‌ జకోవిచ్‌ మరో అడుగు ముందుకేశాడు. మూడో రౌండ్లో నొవాక్‌ 6-3, 6-3, 6-2తో కారుసో (ఇటలీ)పై విజయం సాధించాడు. ఈ మ్యాచ్‌లో ఎనిమిది ఏస్‌లు కొట్టిన జకో.. ఐదుసార్లు ప్రత్యర్థి సర్వీస్‌ బ్రేక్‌ చేశాడు.

ప్రిక్వార్టర్స్​ చేరిన గ్రీక్​ ఆటగాడు...

గ్రీసు వీరుడు సిట్సిపాస్‌ ప్రిక్వార్టర్స్‌లో అడుగుపెట్టాడు. మూడో రౌండ్లో 7-5, 6-3, 6-7 (7-5), 7-6 (8-6)తో క్రాజానోవిచ్‌ (క్రొయేషియా)పై చెమటోడ్చి గెలిచాడు సిట్రిపాస్​. గత 83 ఏళ్లలో రొలాండ్‌ గారోస్‌లో ప్రిక్వార్టర్స్‌ చేరిన తొలి గ్రీకు ఆటగాడిగా సిట్సిపాస్‌ ఘనత సాధించాడు.

గ్రీసు వీరుడు సిట్సిపాస్‌

మోన్‌ఫిల్స్‌ 6-3, 6-2, 6-3తో హయాంగ్‌ (ఫ్రాన్స్‌)ను ఓడించగా.. ఫాగ్‌నిని 7-6, (7-5), 6-4, 4-6, 6-1తో బటిస్టా అగట్‌ (స్పెయిన్‌)పై గెలిచాడు. ఫలితంగా మోన్‌ఫిల్స్‌ , ఫాగ్‌నిని ప్రిక్వార్టర్స్‌ చేరారు.

జర్మనీ కుర్రాడు అలెగ్జాండర్‌ జ్వెరెవ్‌ కూడా ముందంజ వేశాడు. ఈ ఐదో సీడ్‌ 6-4, 6-2, 4-6, 1-6, 6-2తో లజోవిచ్‌ (క్రొయేషియా)ను ఓడించాడు. హోరాహోరీగా సాగిన మరో సమరంలో వావ్రింకా (స్విట్జర్లాండ్‌) 7-6 (7-5), 7-6 (7-4), 7-6 (10-8)తో దిమిత్రోవ్‌ (బల్గేరియా)పై విజయం సాధించాడు.

డొమినిక్‌ థీమ్‌ (కెనడా), స్ట్రఫ్‌ (జర్మనీ), బోర్నా కొరిచ్‌ (క్రొయేషియా) కూడా ప్రిక్వార్టర్స్‌లో స్థానం సంపాదించారు.

పేస్‌, జీవన్‌కు చుక్కెదురు

డబుల్స్‌లో లియాండర్‌ పేస్‌ ఓడిపోయాడు. రెండో రౌండ్లో పేస్‌-పెయిర్‌ (ఫ్రాన్స్‌) 0-6, 6-4, 3-6తో కబాల్‌-ఫరా (కొలంబియా) చేతిలో పరాజయం చవిచూశారు. మిక్స్‌డ్‌ డబుల్స్‌ తొలి రౌండ్లో జీవన్‌-మూర్‌ 7-5, 4-6, 0-1 (5-10)తో చెన్‌-మరాచ్‌ చేతిలో ఓడారు. ఫలితంగా టోర్నీ నుంచి నిష్క్రమించాడు జీవన్​.