ఉత్కంఠభరిత మ్యాచ్​లో అభిమానుల 'పోరు'

ఆస్ట్రేలియా ఓపెన్​లో నిక్​ కిర్గియోస్​, కరెన్​ కచనోవ్​ మధ్య పోరు​ ఉత్కంఠగా సాగింది. ఇద్దరూ దాదాపు 4 గంటల 20 నిముషాలు పోటీపడ్డారు. ఈ మ్యాచ్​ వీక్షించేందుకు వచ్చిన ఇద్దరు ప్రేక్షకులు గ్యాలరీలోనే కొట్టుకున్నారు. అందరూ చూస్తుండగా ఒకరిపై మరొకరు పిడిగుద్దులు విసురుకున్నారు. ప్రస్తుతం ఈ వీడియో నెట్టంట వైరల్​గా మారింది.

ప్రతిష్టాత్మక ఆస్ట్రేలియా ఓపెన్​లో భాగంగా మూడో రౌండ్​ మ్యాచ్​లో కరెన్​ కిచనోవ్​(రష్యా)-నిక్​ కిర్గియోస్​​(ఆస్ట్రేలియా) పోటీపడ్డారు. మెల్​బోర్న్​ ఎరీనా వేదికగా శనివారం ఈ టెన్నిస్​ పోరు జరిగింది. అయితే ఆట వీక్షించందుకు వచ్చిన ఇద్దరు వ్యక్తులు మ్యాచ్​ జరుగుతున్న సమయంలో ఒకరిపై మరొకరు పంచ్​లు విసురుకున్నారు. ఈ ఘటనలో పక్కనే ఉన్న ఓ మహిళకు గాయమైంది. ఇంతలో కలుగజేసుకున్న సహ ప్రేక్షకులు ఆ ఇద్దర్నీ శాంతిపజేశారు. ఘటన తర్వాత భద్రతా సిబ్బంది వారిని బయటకి పంపించేసినట్లు తెలుస్తోంది. ప్రస్తుతం ఈ వీడియో నెట్టింట వైరల్​గా మారింది.

నిక్​ కిర్గియోస్, కరెన్​ మధ్య జరిగిన ఈ మ్యాచ్ చివరి వరకు ఉత్కంఠగా సాగింది. ఐదు సెట్లు జరిగిన మ్యాచ్​లో తొలి రెండు సెట్లను 6-2, 7-6 తేడాతో గెలిచాడు 23వ సీడ్​ నిక్​. ఆ తర్వాత రెండు సెట్లను 6-7, 6-7 తేడాతో కైవసం చేసుకున్నాడు కరెన్​​. నిర్ణయాత్మక ఆఖరి సెట్​ను 7-6 తేడాతో గెలిచి విజేతగా నిలిచాడు నిక్​. ఈ మ్యాచ్ ​దాదాపు 4 గంటల 20 నిముషాలు జరిగింది. తాజా విజయంతో ఆస్ట్రేలియా ఓపెన్​లో నాలుగోసారి నాలుగో రౌండ్​కు చేరాడు నిక్ కిర్గియోస్​​. తర్వాతి మ్యాచ్​లో ఇతడు ప్రపంచ నెం.1 రఫెల్​ నాదల్​తో తలపడనున్నాడు.