పోలాండ్ కీల్స్ వేదికగా జరుగుతోన్న ప్రపంచ యూత్ ఛాంపియన్షిప్ బాక్సింగ్ పోటీల్లో భారత బాక్సర్లు సత్తా చాటుతున్నారు. కనీసం నాలుగు పతకాలు భారత్ ఖాతాలో చేరనున్నాయి. నలుగురు మహిళా బాక్సర్లు సెమీస్కు అర్హత సాధించారు.
60 కేజీల విభాగంలో పానిపత్ బాక్సర్ విన్కా.. కొలంబియా బాక్సర్ కమిలో కమేలాపై 5-0 తేడాతో గెలుపొందింది. 81 పైచిలుకు కేజీల విభాగంలో ఆల్ఫియా.. హంగేరీ బాక్సర్ రేకా హాఫ్మన్పై 5-0తో విజయం సాధించింది. ఈ ఇద్దరు బాక్సర్లు చివరి నాలుగో రౌండ్కు అర్హత సాధించారు.
కజకిస్థాన్ బాక్సర్ నాజర్కే సెరిక్పై భారత బాక్సర్ పూనమ్(57 కేజీ) 5-0 తేడాతో గెలుపొంది.. సెమీస్లోకి ప్రవేశించింది. మరో భారత బాక్సర్ గీతికా(48 కేజీ).. రొమేనియా బాక్సర్ ఎలిజబెత్ ఒస్టాన్పై విజయం సాధించింది. బలమైన పంచులతో ప్రత్యర్థిపై విరుచుకుపడింది ఈ హరియాణా బాక్సర్. దీంతో తొలి రౌండ్ అనంతరం గీతికాను విజేతగా ప్రకటించారు.
81 కేజీల విభాగంలో మరో మహిళా బాక్సర్ కృషి.. క్వార్టర్ ఫైనల్లో పరాజయం చవిచూసింది. టర్కీ బాక్సర్ బుస్రా ఇసిల్దార్ విజయం సాధించింది.
ఇక పురుషుల విభాగంలో మనీష్(75 కేజీ), సుమిత్(69 కేజీ) క్వార్టర్ ఫైనల్లోకి దూసుకెళ్లారు.