ప్రతిష్టాత్మక యూఎస్ ఓపెన్ 2022 టోర్నీ టైటిల్ పోరులో ఇగా స్వైటెక్‌ అదరగొట్టింది. అంచనాలకు తగ్గట్టుగా ఆడిన ఈ పోలెండ్ స్టార్ ప్లేయర్‌ ఫైనల్లో ప్రత్యర్థిని చిత్తు చేసి తన లక్ష్యాన్ని సాధించింది. 6-2,7-6(5) తేడాతో ట్యునీషియా అమ్మాయి ఐదో సీడ్‌ ఆన్స్ జాబెర్ను ఓడించి మరోసారి తన సత్తా చాటింది. యూఎస్ ఓపెన్లో ఇదే ఆమెకు తొలి టైటిల్. అలానే ఈ ట్రోఫీని ముద్దాడిన తొలి పోలెండ్ క్రీడాకారిణిగానూ రికార్డు సృష్టించింది. దీంతో స్వైటెక్‌ తన కెరీర్‌లో మూడో గ్రాండ్‌స్లామ్‌ టైటిల్‌ను సాధించినట్లైంది. ఆమె 2020, 2022లో ఫ్రెంచ్‌ ఓపెన్ టైటిళ్లను గెలుచుకొంది. తాజా విజయంతో ఆమె ప్రపంచ నం.1 ర్యాంక్‌ను మరింత బలోపేతం చేసుకుంది.
- గత కొన్ని నెలలుగా ఉక్రెయిన్‌కు మద్దతుగా స్వైటెక్‌ తన టోపీపై ప్రత్యేకమైన రిబ్బన్‌ ధరించి బరిలోకి దిగింది. ఆమె గత కొన్ని నెలలుగా అంతర్జాతీయ మ్యాచ్‌ల్లో ఈ విధంగా చేస్తోంది.
- ఈ టైటిల్ సాధించిన తొలి పోలెండ్ క్రీడాకారిణిగా స్వైటెక్‌ ఘనతను సాధించింది.
- ఈ ఏడాది ఆమె మూడు సార్లు గ్రాండ్‌ స్లామ్‌ సెమీస్‌కు చేరగా రెండు సార్లు టైటిళ్లను సాధించింది. సెమీస్‌కు చేరిన వాటిల్లో ఆస్ట్రేలియన్‌ ఓపెన్, ఫ్రెంచ్‌ ఓపెన్, యూఎస్ ఓపెన్ టోర్నీలు ఉన్నాయి.
- ఒక టాప్‌ సీడెడ్‌ క్రీడాకారిణి యూఎస్ ఓపెన్ టైటిల్ గెలవడం 8 ఏళ్ల తర్వాత ఇదే. 2014లో సెరీనా విలియమ్స్‌ టాప్‌సీడెడ్‌ క్రీడాకారిణిగా బరిలోకి దిగి ఈ టైటిల్‌ను అందుకొన్నారు.
- ఈ సీజన్‌లో ఆమె ఒక దశలో వరుసగా 37 మ్యాచ్‌ల్లో ఓటమిని చవిచూడలేదు. వింబుల్డన్‌ మూడో రౌండ్‌లో ఈ జైత్రయాత్రకు అడ్డుకట్టపడింది.
- హార్డ్‌కోర్ట్‌ టోర్నీల్లో స్వైటెక్‌ ఆటతీరు చాలా బలంగా ఉంటుంది. ఈ రకం కోర్టులపై నాలుగు డ్ల్యూటీఏ1000 టైటిళ్లలో విజయం సాధించి సన్‌షైన్‌ డబుల్‌ను సాధించిన 4వ క్రీడాకారిణిగా నిలిచింది.