మహిళల ప్రపంచ బాక్సింగ్ ఛాంపియన్‌షిప్లో తెలంగాణకు చెందిన నిఖత్ జరీన్ పసిడిని ముద్దాడిన సంగతి తెలిసిందే. 50 కేజీల విభాగంలో గోల్డ్ మెడల్ సాధించిన నిఖత్.. ఈ గెలుపుతో వరుసగా రెండోసారి వరల్డ్ బాక్సింగ్ ఛాంపియన్‌షిప్ సాధించిన రెండో భారత బాక్సర్గా రికార్డుకెక్కింది. దీంతో ఆమెపై సర్వత్రా ప్రశంసల వర్షం కురిపిస్తున్నారు. ఈ క్రమంలోనే ఆమెకు సరికొత్త థార్ SUVను బహుమతిగా ఇచ్చింది మహీంద్రా సంస్థ. అయితే ఈ బహుమతితో ఆమె తనకు సంబంధించిన ఓ నిర్ణయాన్ని మార్చుకుంది.
మొదటగా ఆమె.. తన విజయంతో వచ్చిన ప్రైజ్మనీతో USD 100,000(భారత కరెన్సీలో 82లక్షల 34,980) లగ్జరీ మెర్సిడెస్ కారును కొనుగోలు చేయాలని ఆశించింది. ఈ విషయాన్ని మీడియా సమావేశంలోనూ పేర్కొంది. అనంతరం మహీంద్రా.. అధునాతన థార్ SUVను బహుమతిగా ఇవ్వడంతో తన ఉద్దేశాన్ని మార్చుకుంది. అస్సలు ఊహించలేదంటూ పేర్కొంది. మెర్సిడెస్ కారును కొనుగోలు చేయలన్నా తన ప్లాన్ను మార్చుకున్నట్లు వెల్లడించింది.
తనకు వచ్చిన నగదు బహుమతితో.. తన తల్లిదండ్రులను 'ఉమ్రా' తీర్థయాత్రకు పంపిస్తానని తెలిపింది. పుణ్యకార్యాల కోసం డబ్బును వినియోగిస్తానని చెప్పుకొచ్చింది. ఈ సందర్భంగా ఆనంద్ మహీంద్రాకు ధన్యావాదాలు తెలిపింది. భవిష్యత్లో ఇలాంటి ప్రోత్సాహకాలు క్రీడాకారులకు స్ఫూర్తినిస్తాయని చెప్పింది.
ఇకపోతే గతంలోనూ ఆనంద్ మహీంద్రా.. దేశం కోసం పతకాలు సాధించిన భారత అథ్లెట్లకు.. సరికొత్త మోడళ్ల కారులను బహుమతిగా ఇచ్చి అభినందనలు తెలిపారు. వీరిలో ఒలింపిక్ గోల్డ్ మెడలిస్ట్ జావిలెన్ ఛాంపియన్ నీరజ్ చోప్రా కూడా ఉన్నాడు. అతడికి మహీంద్ర XUV 700ను బహుమతిగా ఇచ్చింది. అలా ఎంతో మంది అథ్లెట్లను మహీంద్రా సంస్థ ప్రోత్సాహించింది.
ఇక తన విజయంపై నిఖత్ జరీన్ మాట్లాడుతూ.. "రెండోసారి వరల్డ్ ఛాంపియన్‌గా నిలవడం చాలా ఆనందంగా ఉంది. చెప్పడానికి మాటలు కూడా రావడం లేదు. ఓ కొత్త అద్భుతమైన అనుభూతినిస్తోంది. నాకు మద్దతుగా నిలిచినవారికి ధన్యవాదాలు. ఈ గోల్డ్ మెడల్ను దేశానికి అంకితం ఇస్తున్నా. ఆటపై ఉన్న ప్రేమే నన్ను ముందుకు నడిపిస్తోంది. దేశం కోసం మెడల్స్ సాధించాలనే పట్టుదల, రింగ్‌లో బరిలోకి దిగితే వంద శాతం పోరాడాలనే అంకిత భావంతోనే ముందుకు సాగుతున్నా. ప్రత్యర్థి ఎవరైనా సరే.. గెలవాలనే లక్ష్యంతోనే ధైర్యం ప్రదర్శిస్తా. ఒలింపిక్స్‌ ఆడాలి. అందులో గోల్డ్మెడల్ సాధించాలి. ఇదే ఎప్పుడూ నన్ను ప్రేరేపిస్తోంది. సొంత అభిమానుల మధ్య విజయం సాధించడం ఎంతో గొప్పగా ఉంది. తల్లిదండ్రుల సమక్షంలో టైటిల్‌ దక్కించుకోవడం ఎప్పటికీ మరిచిపోలేను. పారిస్‌ ఒలింపిక్స్‌ దృష్టిలో పెట్టుకుని వెయిట్ కేటగిరి మారాలనుకున్నా. 54తో పోలిస్తే 50 కేజీలకు మారడమే సులువనిపించింది. బరువు తగ్గాలని నిర్ణయించుకున్నా. దీనికోసం ఎంతో కష్టపడ్డా. ఆహార నియమాలు పాటించా. ఒలింపిక్స్‌కు ముందు ఈ కేటగిరి నా ప్రదర్శన ఎలా ఉంటుందో తెలుసుకోవాలనే కామన్వెల్త్‌ క్రీడల్లో 50 కేజీల విభాగంలో పోటీపడ్డాను. అప్పుడు పసిడి సాధించాను. ఇప్పుడు ప్రపంచ ఛాంపియన్‌షిప్స్‌లోనూ గెలిచాను" అని నిఖత్ జరీన్ హర్షం వ్యక్తం చేసింది.
ఇదీ చూడండి:IPL 2023 : అత్యధిక పరుగులు చేసిన 'చెన్నై' టాప్-5 బ్యాటర్లు వీళ్లే.. మహీది ఎన్నో ప్లేస్?
