రష్యాపై 'వాడా' వేటు.. టోక్యో ఒలింపిక్స్​కు​ దూరం

ప్రపంచ యాంటీ డోపింగ్ సంస్థ(వాడా).. ప్రపంచ టోర్నీల్లో రష్యా పాల్గొనకుండా నిషేధం విధించింది. నాలుగేళ్ల పాటు ఈ వేటు అమల్లో ఉండనుంది. ఈ కారణంగా వచ్చే ఏడాది జరిగే ఒలింపిక్స్​కు రష్యా దూరం కానుంది.

గత కొద్ది కాలంగా ఆంక్షలు ఎదుర్కొంటున్న రష్యాకు మరో ఎదురుదెబ్బ తగిలింది. డోపింగ్ ఆరోపణలతో అంతర్జాతీయ టోర్నీల్లో పాల్గొనకుండా నిషేధం విధించింది ప్రపంచ యాంటీ డోపింగ్ సంస్థ(వాడా). నాలుగేళ్ల పాటు ఏ టోర్నీలోనూ పాల్గొనకుండా రష్యాపై వేటు వేసింది.

ఈ కారణంగా వచ్చే ఏడాది జరగనున్న టోక్యో ఒలింపిక్స్​, 2022 బీజింగ్ వింటర్ ఒలింపిక్స్​కూ దూరం కానుంది రష్యా. స్విట్జర్లాండ్ వేదికగా సోమవారం జరిగిన సమావేశంలో ఈ అంశంపై చర్చించారు వాడా బోర్డు సభ్యులు.

మాస్కోలోని యాంటీ డోపింగ్ లేబరేటరీలో వివరాలు తారుమారుచేసేందుకు ప్రయత్నించిందన్న ఆరోపణల అనంతరం ఈ నిర్ణయం తీసుకున్నారు వాడా బోర్డు సభ్యులు. ఏళ్ల తరబడి అంతర్జాతీయ క్రీడల్లో రష్యా మోసపూరితంగా వ్యవహరిస్తుందని, ఇందుకు శిక్షతప్పదని ఏకగ్రీవంగా తీర్మానించారు.

రష్యన్లు ఆడొచ్చు

రష్యాపై వేటు పడిన కారణంగా ఆ దేశ క్రీడాకారుల్లో ఆందోళన మొదలైంది. అయితే వారు ఎలాంటి నిషేధిత ఉత్ప్రేరకాలు వాడలేదని నిరూపణయితే తటస్థంగా(ఏ దేశం నుంచి ప్రాతినిధ్యం వహించకుండా) ఒలింపిక్స్​లో పాల్గొనవచ్చని వాడా ప్రతినిధి జేమ్స్ ఫిట్జ్​గెరాల్డ్ చెప్పారు. 2016లో సిరియా శరణార్థులు ఈ విధంగానే రియో ఒలింపిక్స్​లో ఆడారు.

ఇదీ చదవండి: కోహ్లీ స్థానంలో దూబే రావడానికి కారణమిదే..!