రెజ్లింగ్ సమాఖ్య వివాదం ఓ కొలిక్కి రాక ముందే స్టార్ అథ్లెట్ వినేశ్ ఫొగాట్‌ ఓ అనూహ్యమైన నిర్ణయం తీసుకుంది. కేంద్ర ప్రభుత్వం తనకు సత్కరించిన 'ఖేల్రత్న', 'అర్జున' అవార్డులను తిరిగి ఇచ్చేస్తున్నట్లు ఆమె ప్రకటించింది. ఈ విషయాన్ని ప్రధాని నరేంద్ర మోదీకి రాసిన ఓ లేఖలో తెలిపింది. "నేను నా మేజర్ ధ్యాన్‌చంద్ ఖేల్ రత్న, అలాగే అర్జున అవార్డును తిరిగి ఇస్తున్నాను" అంటూ వినేశ్ తన ట్విట్టర్ ఖాతాలో పోస్ట్ చేసిన ఆ లేఖలో పేర్కొంది.
"గౌరవనీయులైన ప్రధాన మంత్రికి
సాక్షి మాలిక్ రెజ్లింగ్ నుంచి తప్పుకుంది. బజరంగ్ పునియా కూడా తన పద్మశ్రీని తిరిగిచ్చేశాడు. ఇందుకు గల కారణాలు ఏంటో దేశం మొత్తానికి తెలుసు. ఈ దేశానికి నాయకుడిగా మీకు కూడా ఈ విషయాలు తెలిసే ఉంటుంది. నేను వినేశ్ ఫోగాట్‌. మీ దేశపు ఆడబిడ్డను. ఏడాదికాలంగా నేను పడుతున్న ఆవేదనను తెలియజేయడానికే ఈ లేఖను రాస్తున్నాను. 2016లో సాక్షి ఒలింపిక్ మెడల్‌ గెలిచిన రోజు నాకు ఇప్పటికీ గుర్తుంది. అప్పుడే మీ ప్రభుత్వం ఆమెను బేటీ బచావో బేటీ పడావోకు బ్రాండ్‌ అంబాసిడర్‌ను చేసింది. అప్పుడు ఈ దేశపు ఆడబిడ్డగా నేనేంతో సంతోషించాను. ఇటీవలే సాక్షి రెజ్లింగ్ నుంచి తప్పుకుంది. మా మహిళా అథ్లెట్లు గవర్నమెంట్ ప్రకటనలల్లో కనిపించడానికే ఉన్నామా? నాకు ఒలింపిక్ పతకం గెలవాలని లక్ష్యం ఉండేది. కానీ ఇప్పుడు అది ఓ కలగానే మిగిలిపోయింది. ఈ ప్రోగ్రాంలో మీ ప్రభుత్వం ఏర్పాటుచేసిన ఫ్యాన్సీ ప్లెక్సీలు ఫేడ్‌ అవుట్‌ అయ్యాయి. సాక్షి కూడా ఆట నుంచి తప్పుకుంది. మమ్మల్ని అణగదొక్కాలని చూసిన వ్యక్తి ఈ ఆటలో తాను లేకున్నా ఆటను డామినేట్‌ చేస్తానని బహిరంగంగానే చెప్తున్నారు. మీ బిజీ షెడ్యూల్లో ఓ ఐదు నిమిషాలైన వెచ్చించి ఆ వ్యక్తి (బ్రిజ్ భూషణ్‌ను ఉద్దేశిస్తూ) ఏం చెప్తున్నారో వినండి. అప్పుడు ఆయన ఏం చేశారో మీకు తెలుస్తుంది. మమ్మల్ని అణగదొక్కడానికి ఆయన ఏ ఒక్క అవకాశాన్ని కూడా వదులుకోవడం లేదు. ఆయన కారణంగానే చాలా మంది మహిళా రెజ్లర్లు ఈ ఆట నుంచి వెనుకడుగువేశారు.." అని ఆ రెండు పేజీల లేఖలో వినేశ్ తన ఆవేదనను ప్రధానికి చెప్పుకుంది.