Time Magazine Athlete Of The Year 2023 : అర్జెంటీనా ఫుట్‌బాల్‌ ప్లేయర్, సాకర్ స్టార్ లియోనల్ మెస్సీ తాజాగా తన కెరీర్లో మరో అరుదైన గౌరవాన్ని అందుకున్నాడు. ప్రముఖ టైమ్ మ్యాగజైన్ 'అథ్లెట్ ఆఫ్ ది ఇయర్'గా ఎంపికయ్యాడు. ఈ బిరుదును మెస్సీకి ఇవ్వనున్నట్లు టైమ్ తమ ట్విట్టర్ ఖాతాలో ఓ ప్రకటన ద్వారా ఈ విషయాన్ని తెలియజేసింది. "గతంలో అసాధ్యంగా కనిపించిన వాటిని ఈ ఏడాది మెస్సీ సుసాధ్యం చేసి చూపించాడు. అతడు ఇంటర్‌ మియామి జట్టుకు సైన్ చేసి చేసి అమెరికాను ఏకంగా సాకర్ దేశంగా మార్చేశాడు" అంటూ మెస్సీని కొనియాడింది. ఈ నేపథ్యంలో ఫ్యాన్స్ మెస్సీకి కంగ్రాజ్యూలేషన్స్ తెలుపుతున్నారు.
మెస్సీ రాకతో ఎంఎల్‌ఎస్‌ టోర్నీకి వీక్షకుల సంఖ్య గణనీయంగా పెరిగిందని టైమ్ సంస్థ తెలిపింది. దీంతోపాటు టికెట్‌ ధరలు, విక్రయాలు కూడా బాగా పెరిగాయంటూ పేర్కొంది. ఈ క్రమంలో గతంలో టైమ్ నుంచి ఈ అవార్డు అందుకొన్న మైకెల్‌ ఫెల్ప్స్‌ (స్విమ్మింగ్‌), సిమోన్‌ బైల్స్‌ (జిమ్నాస్టిక్స్‌) వంటి వారి దిగ్గజాల సరసన మెస్సీ చేరాడు.
Lionel Messi Miami Club : ఇక మెస్సీ కెరీర్ విషయానికి వస్తే.. గతంలో పారిస్‌ సెయింట్‌ జర్మన్‌ క్లబ్‌కు ప్రాతినిధ్యం వహించిన ఈ స్టార్ ప్లేయర్ ఆ కాంట్రాక్టు ముగిసిన తర్వాత తన హోమ్ ప్లేస్ లాంటి బార్సిలోనా క్లబ్‌లో తిరిగి రావాలనుకున్నాడు. కానీ ఆ అవకాశం రాలేదు. దీంతో మియామి లేదా సౌదీ లీగ్‌లో చేరాలని నిర్ణయించుకున్నాడు. అలా తాజాగా మియామి క్లబ్లోకి మెస్సీ ఎంట్రీ ఇచ్చాడు. మెస్సీతో మియామి 20 మిలియన్‌ డాలర్లకు ఒప్పందం చేసుకొంది.