Ashleigh Barty Retires: మహిళల టెన్నిస్ ప్రపంచ నంబర్‌ వన్ ర్యాంకర్ ఆష్లే బార్టీ సంచలన నిర్ణయం తీసుకుంది. 25 ఏళ్ల టెన్నిస్ క్రీడాకారిణి బార్టీ ప్రొఫెషనల్‌ ఆటకు వీడ్కోలు పలుకుతున్నట్లు ప్రకటించింది. రిటైర్‌మెంట్‌పై సోషల్‌ మీడియా వేదికగా ఓ వీడియోను ఆమె పోస్టు చేసింది. ఆస్ట్రేలియాకు చెందిన బార్టీ మూడు గ్రాండ్‌స్లామ్‌లను గెలుచుకుంది. ఈ ఏడాది ఆస్ట్రేలియన్‌ ఓపెన్‌ను సొంతం చేసుకున్న ఆమె ఇలాంటి నిర్ణయం తీసుకోవడమంటే సంచలనమని చెప్పాలి. దాదాపు 44 సంవత్సరాల తర్వాత ఆస్ట్రేలియన్‌ ఓపెన్‌, 41 ఏళ్ల తర్వాత వింబుల్డన్ గెలిచిన ఆస్ట్రేలియా క్రీడాకారిణిగా ఆష్లే రికార్డు సృష్టించింది.
"ఇలాంటి కఠిన నిర్ణయం ఎలా వెల్లడించాలో అర్థం కావడం లేదు. టెన్నిస్‌కు వీడ్కోలు చెబుతున్నా. అయితే నేను సంతోషంగానే ఉన్నా. అదేవిధంగా దేనికైనా సిద్ధంగా ఉన్నా. సూపర్ గేమ్‌ కోసం నా వంతు కృషి చేశాను. అందుకు ఎంతో ఆనందంగా ఉంది. నా వరకైతే విజయవంతంగా ముగించాను. ఈ సందర్భంగా నాకు అండగా నిలిచిన ప్రతి ఒక్కరికీ ధన్యవాదాలు. రిటైర్మెంట్ ప్రకటించడానికి ఇదే సరైన సమయమని భావిస్తున్నా. మిగిలిన కలలను నెరవేర్చుకోవడంపై దృష్టిసారిస్తా" అని బార్టీ పేర్కొంది. ప్రపంచ టెన్నిస్ సంఘం స్పందిస్తూ.. ‘ప్రతి యువ టెన్నిస్ క్రీడాకారిణికి స్ఫూర్తిగా నిలుస్తావు. ఆట పట్ల నీకున్న ప్రేమ అమోఘం. ఆన్‌-కోర్టు, ఆఫ్‌-కోర్టులో నీదైన మార్క్‌ను ప్రదర్శించావు" అని పోస్టు చేసింది.