క్రికెట్‌, కబడ్డీ, హాకీ తదితర క్రీడల్లో ఇప్పటికే దేశంలో, ప్రపంచంలో ఎన్నో లీగ్‌లు జరుగుతున్నాయి. ఇప్పుడిక చదరంగాన్ని అత్యున్నత స్థాయికి చేర్చేందుకు గ్లోబల్ చెస్ లీగ్ వచ్చేస్తోంది. ఈ ఫిజిటల్‌ (ఫిజికల్‌, డిజిటల్‌) గ్లోబల్ చెస్ లీగ్‌కు శ్రీకారం చుడుతున్నట్లు ప్రముఖ ఐటీ సేవల సంస్థ టెక్ మహీంద్రా సోమవారం ప్రకటించింది.
అయిదు సార్లు ప్రపంచ ఛాంపియన్‌, భారత గ్రాండ్మాస్టర్ విశ్వనాథన్ ఆనంద్ ఈ లీగ్‌కు మార్గనిర్దేశకుడిగా, భాగస్వామిగా, సలహాదారుడిగా.. ఇలా అన్ని రకాలుగా లీగ్‌ను తీర్చిదిద్దడంలో కీలక పాత్ర పోషించబోతున్నాడు. ప్రపంచవ్యాప్తంగా ఎనిమిది ఫ్రాంఛైజీలు ఈ లీగ్‌లో పాల్గొననున్నాయి. అగ్రశ్రేణి మహిళలు, పురుషులతో పాటు జూనియర్‌, వైల్డ్‌కార్డు ప్రవేశం పొందే ప్లేయర్లు ఒక్కో జట్టులో ఉంటారు. రౌండ్‌ రాబిన్‌ విధానంలో ఒకరికొకరు పోటీపడతారు.