Sania Mirza Retirment: అయిదేళ్లకే రాకెట్‌ పట్టింది. 15 ఏళ్లకే ప్రొఫెషనల్‌ టెన్నిస్‌లో అడుగుపెట్టింది. సుదీర్ఘ కాలంగా ఆటలో కొనసాగుతోంది. ఈ ప్రయాణంలో ఎన్నో గాయాలు, మరెన్నో ఒడుదొడుకులు, అనేక వివాదాలు.. వీటన్నింటినీ అధిగమించి డబుల్స్‌లో నంబర్‌వన్‌గా ఎదిగింది. కెరీర్‌లో అత్యున్నత స్థాయికి చేరుకుంది. భారత టెన్నిస్‌లో మరే క్రీడాకారిణి అందుకోని ఘనతల్ని సొంతం చేసుకుంది. సానియా మీర్జా ఘన ప్రస్థానమిది. సుదీర్ఘ ప్రయాణం తర్వాత 35 ఏళ్ల సానియా టెన్నిస్‌కు వీడ్కోలు పలకాలని నిర్ణయించుకుంది. తన కెరీర్‌లో ఇదే చివరి సీజన్‌ అని ప్రకటించింది. అద్వితీయ ఘనతలతో భారత్‌లో ఎంతోమంది చిన్నారులకు స్ఫూర్తిగా నిలిచిన సానియా తన క్రీడా ప్రస్థానం గురించి పంచుకున్న విశేషాలివీ..
సానియా ఈ స్థితిలో ఉండటానికి ఎలాంటి సవాళ్లను ఎదుర్కొంది?
భారతీయ మహిళలు ఎన్నో రంగాల్లోకి ప్రవేశించి విజయవంతమయ్యారు. కానీ తమను శక్తిగా పరిగణించని కొన్ని రంగాల్లో అడుగుపెట్టలేదు లేదా పూర్తిస్థాయిలో దృష్టిసారించలేదు. అందులో టెన్నిస్ కూడా ఒకటి. టెన్నిస్‌లో అంతర్జాతీయ వేదికలపై భారతీయ మహిళలు సత్తాచాటగలరని నా దేశంతో పాటు మిగతా ప్రపంచ ప్రజలకు నిరూపించడమే నేను ఎదుర్కొన్న అతి పెద్ద సవాలు. ఆ సవాలును విజయవంతంగా అధిగమించి ఈ స్థాయికి చేరుకున్నా.
సుమారు 30 ఏళ్ల పాటు ప్రతిరోజూ ఉదయాన్నే శిక్షణకు వెళ్లడానికి మిమ్మల్ని ప్రేరేపించింది ఏమిటి?
ఆటపై ఇష్టమే నాకు ప్రేరణ. ఎన్ని గాయాలైనా.. ఎన్ని శస్త్రచికిత్సలు జరిగినా ఆటపై మక్కువే నన్ను ఇన్నేళ్లుగా నడిపిస్తుంది. ఎంతో ఇష్టమైన క్రీడలో నా దేశం కోసం రాణించాలనే ఉత్సాహం నన్ను కష్టపడి పనిచేసేలా చేసింది. ప్రతిరోజూ ఉదయం టెన్నిస్ రాకెట్‌ పట్టేలా స్ఫూర్తినింపింది.
క్రీడాకారిణిగా, భార్యగా, తల్లిగా మీ బలాలు ఏంటి?
ఒకసారి లక్ష్యాలను నిర్దేశించుకుంటే సాధించే వరకు వదిలిపెట్టను. అందుకోసం నా శక్తికి మించి ప్రయత్నిస్తా. ఎంత కష్టమైనా మధ్యలో విడిచిపెట్టను. అన్నిటికి మించి నా కుటుంబమే నా బలం.
గొప్ప అథ్లెట్‌గా మారడంలో మీకు కలిసొచ్చిన అంశాలేంటి?
ప్రతిభ, పోరాడేతత్వం, కష్టపడేతత్వం, సత్తా చాటాలన్న తపన, ఆత్మవిశ్వాసం ఉండటం. ఓటమికి కుంగిపోకపోవడం. నిరుత్సాహం నుంచి తిరిగి పుంజుకునే సారమ్థ్యం కలిగి ఉండటం. ప్రతి మ్యాచ్‌ను ఆస్వాదించగలగడం.
ప్రొఫెషనల్‌ క్రీడాకారిణిగా మీరు నేర్చుకున్న పాఠం ఏమిటి?
అత్యున్నత స్థాయిలో విజయం సాధించడానికి ఎదురయ్యే కష్టాలను.. సవాళ్లను ఎల్లప్పుడూ ఆస్వాదించాలి. మన శక్తిసామర్థ్యాలపై నమ్మకం ఉండాలి. ఈ రెండూ ఉంటే ఎవరూ ఆపలేరు.
అత్యున్నత స్థాయిలో క్రీడాకారిణిగా కొనసాగడంలో కఠినమైన అంశం ఏమిటి?
సుదీర్ఘ కాలం పాటు ఇంటికి, కుటుంబానికి దూరంగా ఉండటం అన్నిటికంటే కష్టం. తల్లిగా మారిన తర్వాత ఈ కష్టం రెట్టింపయింది. కుమారుడిని ఇంటి దగ్గర విచిడిపెడితే మనసంతా అతని చుట్టే ఉంటుంది. ఒకవేళ వెంట తీసుకెళ్తే కరోనా మహమ్మారి వెంటాడుతోంది. ఈ క్లిష్ట పరిస్థితుల్లో ఆటను, కుమారుడితో సమయాన్ని సమన్వయం చేసుకోవడం అత్యంత కఠినమైన అంశం.