భారత స్ప్రింటర్ ద్యుతీ చంద్ టోక్యో ఒలింపిక్స్కు(Tokyo Olympics) అర్హత సాధించింది. ప్రపంచ ర్యాంకింగ్స్ కోటాలో 100 మీ, 200 మీ విభాగంలో బెర్త్ ఖాయం చేసుకుంది. ఒలింపిక్స్లో 100 మీ. పోటీల్లో 22 ఖాళీలు ఉండగా, 200 మీ. పరుగు పందెంలో 15 ఖాళీలు ఉన్నాయి. 100 మీ. విభాగంలో ప్రపంచ ర్యాంకింగ్స్లో 44వ స్థానంలో ఉన్న ద్యుతీ.. 200 మీ. విభాగంలో 51వ స్థానంలో నిలిచింది.
ఖేల్రత్నకు సిఫార్సు..
దేశ అత్యున్నత క్రీడాపురస్కారం ఖేల్రత్నకు(KhelRatna) ప్రముఖ అథ్లెట్ ద్యుతీ చంద్ పేరును నామినేట్ చేసింది ఒడిశా ప్రభుత్వం. ఈమెతో పాటు మరో ఐదుగురి పేర్లను ఈ అవార్డులకు సిఫార్సు చేసింది.
"ఖేల్రత్న అవార్డుకు నా పేరు నామినేట్ చేసిన ఒడిశా ముఖ్యమంత్రి నవీన్ పట్నాయక్కు ధన్యవాదాలు. నా మీద మీ ఆశీర్వాదాలు ఎల్లప్పుడు ఉండాలని కోరుకుంటున్నాను."
-ద్యుతీ చంద్, భారత స్ప్రింటర్.
2018 ఆసియా గేమ్స్లో 100 మీ., 200 మీ. ఈవెంట్లో రజత పతకం గెలుపొందిన ద్యుతీని గతేడాది అర్జున అవార్డు వరించింది. ద్యుతీతో పాటు పురుషుల హాకీ వైస్ కెప్టెన్ బిరేంద్ర లక్రా(అర్జున అవార్డు), హాకీ కోచ్ కలు చరణ్ చౌదరీ(ద్రోణాచార్య అవార్డు), మాజీ స్ప్రింటర్ అనురాధ బిస్వాల్(ధ్యాన్చంద్)ను వివిధ అవార్డులకు నామినేట్ చేసింది ఒడిశా ప్రభుత్వం.
ఇదీ చదవండి:ద్యుతీ జాతీయ రికార్డు.. ఐనా దక్కని టోక్యో బెర్త్
