అమ్మాయితో​ మహిళా అథ్లెట్ 'రిలేషన్​షిప్'​

మహిళా అథ్లెట్ ద్యుతీ చంద్.. సొంత రాష్ట్రం ఒడిశాకు చెందిన అమ్మాయితో రిలేషన్​షిప్​లో ఉన్నట్లు చెప్పింది. ఇలాంటి బంధం కలిగి ఉన్నానని చెప్పిన భారత క్రీడాకారుల్లో ద్యుతి మొదటి వ్యక్తి.

భారత మహిళా స్ప్రింటర్ ద్యుతీ చంద్ తన జీవితానికి సంబంధించిన ఆసక్తికర విషయాన్ని వెల్లడించింది. ప్రస్తుతం ఓ అమ్మాయితో రిలేషన్​షిప్​లో ఉన్నట్లు పేర్కొంది. ఆమెది ఒడిశాలోని చకా గోపాల్​పూర్ అని చెప్పినా పేరు వెల్లడించేందుకు నిరాకరించింది. ఇలాంటి బంధాన్ని కలిగి ఉన్నానని ఓ భారతీయ అథ్లెట్ చెప్పడం ఇదే తొలిసారి.

100 మీటర్ల పరుగు పందెలో జాతీయ రికార్డు నెలకొల్పిన ద్యుతి.. 2018 ఆసియా క్రీడల్లో రెండు వెండి పతకాలు సాధించింది. ప్రపంచ ఛాంపియన్​షిప్, 2020 టోక్యో ఒలింపిక్స్​లోనూ పతకాలు సాధించేందుకు ప్రస్తుతం శిక్షణ తీసుకుంటోంది.

సెక్షన్ 377 ప్రకారం ఇద్దరు అమ్మాయిలు కానీ ఇద్దరు అబ్బాయిలు కానీ రిలేషిన్​షిప్​లో ఉండటం నేరం కాదని భారత సుప్రీంకోర్టు తీర్పిచ్చింది. కానీ పెళ్లి చేసుకోవడం మాత్రం ఇంకా చట్టబద్ధం కాలేదు.