ఆదివారం జరిగిన స్పెయిన్ మాస్టర్స్ టోర్నీలో భారత్కు చేదు అనుభవం ఎదురయ్యింది. స్టార్ షట్లర్ పీవీ సింధు ఫైనల్‌ మ్యాచ్లో ఓటమిని మూటగట్టుకుని వెనుతిరిగింది. ఇండోనేషియాకు చెందిన టుంజుంగ్‌ చేతిలో 8-21, 8-21 తేడాతో సింధు ఓటమిని చవి చూసింది.
2022 ఆసియా టీమ్ ఛాంపియన్‌షిప్ను సొంతం చేసుకున్న ఇండోనేషియాన్ మాజీ జూనియర్ ప్రపంచ ఛాంపియన్ టుంజంగ్ ముందు సింధూ నిలవలేకపోయింది. ప్రారంభంలోనే ఇండోనేషియా ప్లేయర్ 5-1తో ఆధిక్యంలో నిలిచింది. అయితే సింధూ కమ్ బ్యాక్ ఇవ్వడానికి ప్రయత్నించి 5-7 స్కోర్ వరకు బాగా ఆడింది. అయితే కొద్దిసేపటికే, ఇండోనేషియా ప్లేయర్ అద్భుతమైన షాట్లతో చెలరేగి 19-6తో స్పష్టమైన ఆధిక్యానికి చేరుకుంది. ఇక రెండో గేమ్‌లో తొలుత వెనుకబడిన టుంజంగ్ కాసేపటికే 11-3 భారీ ఆధిక్యంతో విజయానికి దగ్గరకు చేరుకుంది. ఆఖరికి 8-21 తేడాతో సింధూ ఓటమిని చవి చూసింది.
కాగా శనివారం జరిగిన సెమీ ఫైనల్స్లో సింగపూర్ ప్లేయర్ యెజియా మిన్‌పై సింధూ విజయం సాధించింది. గాయం కారణంగా సుదీర్ఘ విశ్రాంతి తీసుకున్న సింధూ.. మ్యాచ్లు ఆడుతూ తిరిగి ఫామ్లోకి రావడానికి కష్టపడుతోంది. వరుస వైఫల్యాలతో సతమతమవుతున్న సింధూకు.. ఈ విజయం ఉత్సాహాన్ని ఇస్తుందని భావించినప్పటికీ నిరాశే ఎదురయ్యింది. 2016 నవంబర్ నుంచి టాప్ 10 లిస్టులో రాణించిన సింధూ.. మొదటిసారిగా ఆ జాబితా నుంచి నుంచి నిష్క్రమించింది. ఇక, మార్చి ఆరంభంలో జరిగిన ఆల్ ఇంగ్లాండ్ ఛాంపియన్షిప్ నుంచి మొదటి రౌండ్లోనే బయటకు వచ్చేసింది. ఆ తర్వాత జరిగిన స్విస్ ఓపెన్ సూపర్ 300లోనూ టైటిల్ను చేజార్చుకుంది. అంతకుముందు జనవరిలో జరిగిన ఇండియన్ ఓపెన్, మలేసియా ఓపెన్లో మొదటి రౌండ్లోనే నిష్క్రమించిది.
కొత్త కోచ్తో కోచింగ్..
ఈ ఏడాది ఫిబ్రవరిలో పీవీ సింధూ తన కోచ్ పార్క్ టే సాంగ్తో విడిపోయిన తర్వాత విధి చౌదరీ ట్రైనింగ్లో శిక్షణ తీసుకుంటోంది. నాలుగేళ్ల పాటు పార్క్ కోచింగ్లో శిక్షణ పొందిన సింధూ ఇటీవలే ఆయనతో మనస్పర్థల వల్ల విడిపోయింది. సింధు నిర్ణయాన్ని గౌరవిస్తూ తానే స్వయంగా తప్పుకుంటున్నట్లు కోచ్ చెప్పాడు. కాగా, 2019 వరల్డ్ ఛాంపియన్‌షిప్స్ నుంచి పార్క్ టే సాంగ్ - పీవీ సింధూ ప్రయాణం మొదలైంది. మొదట్లో అతడిని మెన్స్ సింగిల్స్ కోచ్గా బ్యాడ్మింటన్ అసోసియేషన్ ఆఫ్ ఇండియా నియమించినప్పటికీ.. తర్వాత సింధు పర్సనల్ కోచ్గా మారాడు. ఇక పార్క్ కోచింగ్ శిక్షణలో సింధూ ప్రపంచ ఛాంపియన్‌షిప్లో స్వర్ణం, టోక్యో ఒలింపిక్స్లో కాంస్య పతకంతో పాటు కామన్వెల్త్ గేమ్స్లో గోల్డ్ మెడల్ను సొంతం చేసుకుంది.
