చెస్ క్రీడాకారుల విరాళాల సేకరణపై మోదీ ప్రశంసలు

కరోనా కట్టడి కోసం వినూత్నంగా ఆలోచించి, విరాళాలు సేకరించిన భారత చెస్ క్రీడాకారుల్ని ప్రధాని మోదీ అభినందించారు. పీఎం కేర్స్​కు వారు రూ.4.5 లక్షల్ని ఇచ్చారు.

ప్రధానమంత్రి నరేంద్ర మోదీ.. భారత్​కు చెందిన ఐదుగురు చెస్ క్రీడాకారులపై ప్రశంసలు కురిపించారు. వినూత్న పద్ధతిలో పీఎం కేర్స్​కు వారు విరాళాలు సేకరించడంపై హర్షం వ్యక్తం చేశారు.

"మన చెస్ ప్లేయర్లు విశ్వనాథన్ ఆనంద్, విదిత్, హరికృష్ణ, అబిదన్, ద్రోణవల్లి హారికల వినూత్న ఆలోచన బాగుంది. వారితో ఆన్​లైన్ పోటీల్లో పాల్గొన్న వ్యక్తులు అద్భుతమైన అనుభవాన్ని పొందుంటారు" -ప్రధాని నరేంద్రమోదీ ట్వీట్

ఈ ఐదుగురు చెస్ క్రీడాకారులు.. ఆన్​లైన్​లో నిర్వహించిన చెస్ పోటీల్లో పాల్గొని రూ.4.5 లక్షల విరాళం సేకరించారు. అనంతరం ఆ మొత్తాన్ని పీఎం కేర్స్​కు అందజేశారు.

భారత్​లో ఇప్పటివరకు కరోనా వల్ల 350 మందికి పైగా మరణించారు. దాదాపు 12 వేలమంది ఈ వైరస్​ బారిన పడ్డారు. రోజురోజుకు దీని తీవ్రత పెరుగుతుండటం వల్లే లాక్​డౌన్​లో మే 3వరకు పెంచుతూ కేంద్రం నిర్ణయం తీసుకుంది.