Paris Olympics 2024 Countdown : వచ్చే ఏడాది జరిగే పారిస్ ఒలింపిక్స్‌కు కౌంట్‌డౌన్‌ మొదలైంది. ప్రపంచ ప్రఖ్యాత ఈఫిల్‌ టవర్‌ కింద కౌంట్‌డౌన్‌ క్లాక్‌ను ఏర్పాటు చేశారు. ఇప్పటికే ఒలింపిక్స్ రింగ్స్‌ను సిటీ హాల్‌ ముందు ఉంచారు. 2024 జులై 26న పారిస్‌లో ఒలింపిక్స్ ఆరంభంకానున్నాయి. ఇందుకోసం ఏర్పాట్లన్నీ ముమ్మరంగా సాగుతున్నాయి. పారిస్‌లోని సీన్‌ నది పక్కన ఒలింపిక్స్ ఆరంభోత్సవానికి సంబంధించిన సాంకేతిక రిహార్సల్స్‌ను నిర్వహించారు. 39 బోట్లు ఇందులో పాల్గొన్నాయి. సీన్‌ నది వద్ద వచ్చే ఏడాది జరిగే వేడుకలను 6 లక్షల మంది వీక్షించే అవకాశం ఉంది.
paris olympics 2024 Dates : విశ్వక్రీడల కోసం కోటి 30 లక్షల మంది పారిస్‌కు విచ్ఛేస్తారని అంచనా వేస్తున్నారు. అంత మంది సందర్శకులకు సరిపడేలా పారిస్‌లో మౌలిక వసతులను కల్పిస్తున్నారు. రవాణా వ్యవస్థ, భద్రత, కేటరింగ్‌ వంటి వాటిపై అధికారులు దృష్టిపెట్టారు. కోటి 30 లక్షల మందికి భోజన సదుపాయాలను కల్పించాల్సి ఉంటుంది. అందుకు తగ్గట్లుగానే ఏర్పాట్లు సాగుతున్నాయి. ఒలింపిక్స్ వల్ల పారిస్‌లోని హోటళ్లు, రెస్టారెంట్లు, దుకాణాల్లో విక్రయాలు భారీగా పెరిగి ఆర్థికంగా ఎంతో లబ్ధి చేకూరనుందని ఫ్రాన్స్‌ సర్కారు భావిస్తోంది.