టోక్యో ఒలింపిక్స్కు సమయం దగ్గర పడుతోంది. మరో ఐదు రోజుల్లో ఈ మెగా ఈవెంట్ ప్రారంభం కానుంది. ఈ నేపథ్యంలో గతంలో విశ్వక్రీడల సందర్భంగా జరిగిన ఆసక్తికర అంశాలు, విశేషాలు, సరదా సన్నివేశాలు మీకోసం..
లాస్ ఏంజెల్స్ ఒలింపిక్స్-1932
- మొట్టమొదటి సారిగా బల్ద్విన్ హిల్స్లో ఒలింపిక్ విలేజ్ను నిర్మించారు. ఇక్కడ ఉండటానికి పురుషులకు అవకాశమిచ్చారు. మహిళ అథ్లెట్లను మాత్రం హోటళ్లలో ఉంచారు.
- బంగారు పతకంతో పాటు వెండి, కాంస్య పతకాలు సాధించిన క్రీడాకారులకు మెడల్స్ ఇవ్వడం కోసం ఒకే పోడియంను ఉపయోగించడం లాస్ ఏంజెల్స్లోనే తొలిసారి.
- స్వర్ణం సాధించిన క్రీడాకారుడి దేశానికి సంబంధించి జాతీయ గీతాన్ని వినిపించడం, జెండాను ప్రదర్శించడం.. ఈ విశ్వక్రీడల నుంచే మొదలైంది.
- ఈ ఒలింపిక్స్లో హాకీలో భారత్, అమెరికా, జపాన్ దేశాలు మాత్రమే పాల్గొన్నాయి. ఇండియాతో 1-24తో, జపాన్తో 2-9 తేడాతో ఓడిపోయింది యూఎస్. అయినప్పటికీ కాంస్య పతకం గెలుచుకుంది అమెరికా.
- ఒలింపిక్ బౌలేవార్డ్ అనేది లాస్ ఏంజెల్స్లోని ఒక ప్రధాన రహదారి. 1932కి పూర్వం దీనిపేరు 10వ వీధి అని ఉండేది. ఇక్కడ ఒలింపిక్స్ క్రీడలు జరిగిన దానికి గౌరవంగా పేరు మార్చారు.
- ఈ ఒలింపిక్స్లో 3000 మీ. పరుగులో ఒక తప్పిదం జరిగింది. దీంతో పోటీలో పాల్గొన్న అథ్లెట్లు 3,460 మీ. పరుగెత్తాల్సి వచ్చింది.
ఇదీ చదవండి:Olympics: ఒలింపిక్స్ కోసం ఇరుకు గదుల్లోనే బస!
బెర్లిన్ ఒలింపిక్స్-1936
- టీవీల్లో మొట్టమొదటి సారిగా ప్రసారమైన ఒలింపిక్స్గా బెర్లిన్ విశ్వక్రీడలు చరిత్ర సృష్టించాయి.
- అక్కడి స్థానికులు ఒలింపిక్స్ను వీక్షించడం కోసం 25 టీవీ రూమ్లను ఉచితంగా ఏర్పాటు చేశారు నిర్వాహకులు.
- తొలిసారిగా లక్ష సామర్థ్యంతో ట్రాక్ అండ్ ఫీల్డ్ స్టేడియాన్ని నిర్మించారు. దానితో పాటు ఆరు వ్యాయామశాలలు కట్టారు.
- టార్చ్ రిలే కార్యక్రమాన్ని తొలిసారిగా 1936 సమ్మర్ ఒలింపిక్స్ నుంచే ప్రారంభించారు.
- అమెరికా అథ్లెట్ జెస్సి ఒవెన్స్.. స్ప్రింట్, లాంగ్ జంప్ విభాగాల్లో నాలుగు బంగారు పతకాలు గెలుచుకుంది. తద్వారా బెర్లిన్లో అత్యంత విజయవంతమైన క్రీడాకారిణిగా ఆమె గుర్తింపు పొందింది.
- ఒలింపిక్స్లో అత్యంత తక్కువ వయసులో స్వర్ణం గెలిచిన మహిళ అథ్లెట్గా అమెరికాకు చెందిన మార్జోరీ గెస్ట్రింగ్(13) రికార్డు సృష్టించింది.
- 200 మీ. బ్రెస్ట్స్ట్రోక్ స్విమ్మింగ్లో కాంస్య పతకం సాధించింది డెన్మార్క్ స్విమ్మర్ సోరెన్సెన్(12). వ్యక్తిగత క్రీడల్లో పతకం సాధించిన తొలి అతి పిన్న వయస్కురాలిగా సరికొత్త ఫీట్ అందుకుంది.
- బాస్కెట్బాల్, కానోయింగ్, హాండ్బాల్ అనే క్రీడలు ఈ ఒలింపిక్స్లో తొలిసారిగా కనిపించాయి.
- జపాన్ క్రీడాకారులు పోల్ వాల్టర్స్ షుహీ నిషిదా, సుయో ఓ క్రీడలో సంయుక్తంగా రెండో స్థానంలో నిలిచారు. ఇద్దరి మధ్య మరో గేమ్ను నిర్వహించాలని నిర్వాహకులు భావించారు. కానీ, వారు అందుకు నిరాకరించారు. వెండి, కాంస్య పతకాలను ఒక్కోదాన్ని రెండుగా విభజించి తీసుకోవాలని నిర్ణయించుకున్నారు.
లండన్ ఒలింపిక్స్-1948
- రెండో ప్రపంచ యుద్ధం కారణంగా 1936 ఒలింపిక్స్ జరిగిన 12 ఏళ్లకు లండన్ ఒలింపిక్స్ జరిగాయి.
- రెండో ప్రపంచ యుద్ధంలో ఓడిపోయిన జర్మనీ, జపాన్.. ఈ ఒలింపిక్స్లో పాల్గొనలేదు.
- ఈ ఒలింపిక్స్కు సోవియట్ యూనియన్ దూరంగా ఉంది. అయినా హంగేరీ, యుగోస్లేవియా, పోలాండ్ వంటి కమ్యూనిస్ట్ దేశాలు ఈ విశ్వక్రీడల్లో పాల్గొన్నాయి.
- ఈ ఒలింపిక్స్లో తొలిసారిగా బడ్జెట్పై పరిమితులు విధించారు.
- లండన్ విశ్వక్రీడల్లో ఒలింపిక్ విలేజ్ను నిర్మించలేదు. పురుష అథ్లెట్లు ఒక ఆర్మీ క్యాంపులో ఉండగా.. మహిళ క్రీడాకారులు సౌత్లాండ్లోనీ ఓ కళాశాలలో ఉన్నారు.
- 100 మీ., 400 మీ. రేసులో అథ్లెట్లకు మొదటి సారిగా ప్రారంభ బ్లాక్స్ను వాడారు.
- డచ్ అథ్లెట్ ఫాన్నీ బ్లాంకర్స్ కోయిన్(30) పాల్గొన్న నాలుగు స్ప్రింట్ ఈవెంట్లలోనూ గోల్డ్ మెడల్స్ సాధించింది.
ఇదీ చదవండి:అథ్లెట్లకు రీసైక్లింగ్ 'బెడ్'.. ఈసారి అది కుదరదు!
