Neeraj Chopra Wins Gold World Athletics Championships 2023 : ట్రాక్‌ అండ్‌ ఫీల్డ్‌లో భారత చరిత్ర తిరగరాస్తూ.. టోక్యో ఒలింపిక్స్‌లో స్వర్ణాన్ని ముద్దాడిన భారత స్టార్ జావెలిన్‌ త్రోయర్‌ నీరజ్ చోప్రా.. ఇప్పుడు మరో సంచలనం సృష్టించాడు. ఇప్పటి వరకు ఏ భారత అథ్లెట్‌కు సాధ్యం కాని ప్రపంచ ఛాంపియన్ హోదాను నీరజ్ అందుకున్నాడు. క్వాలిఫయింగ్‌ టోర్నీలో ఒకే ఒక్క త్రోతో ఫైనల్కు దూసుకెళ్లిన అతడు.. తుదిపోరులోనూ అదే జోరు కొనసాగించాడు. మొదటి ప్రయత్నంలోనే ఫెయిల్ అయినా.. రెండో ప్రయత్నంలోనే అత్యుత్తమ ప్రదర్శనతో స్వర్ణాన్ని సొంతం చేసుకున్నాడు. అయితే ఈ విజయంపై హర్షం వ్యక్తం చేసిన నీరజ్.. ఈ బంగారు పతకాన్ని దేశానికి అంకితమిస్తున్నట్లు తెలిపాడు.
అయితే నీరజ్ గతంలో పలు పోటీల్లో గెలిచి చాలా రికార్డులు సృష్టించినప్పటికీ.. ఇప్పటివరకు తన బల్లెంను 90 మీటర్ల దూరాన్ని విసరలేకపోయాడు. చాలా సార్లు దీనిపై సోషల్మీడియాలో చర్చ కూడా జరిగింది. తాను కూడా 90 మీటర్ల లక్ష్యాన్ని చేరుకోవడానికి కష్టపడుతున్నట్లు నీరజ్ ఇప్పటికే చాలా సార్లు చెప్పాడు. తాజాగా ప్రపంచ ఛాంపియన్ఫిప్ విజయం గురించి మాట్లాడుతూ.. తన 90 మీటర్ల లక్ష్యం గురించి కూడా స్పందించాడు. త్వరలోనే కచ్చితంగా ఆ లక్ష్యాన్ని చేరుకుంటానని ధీమా వ్యక్తం చేశాడు.
"ప్రతి ఒక్కరు అంటుంటారు ఈ మెడల్ ఇంకా మిగిలి ఉందని. అది ఈ రోజు తీరిపోయింది. ఇంకా 90 మీటర్ల లక్ష్యం మాత్రం మిగిలి ఉంది. భవిష్యత్ పోటీల్లో ఆ లక్ష్యాన్ని నెరవేర్చుకుంటాను. అన్నీ త్రోలను కాన్ఫిడెంట్తోనే విసిరాను. నిలకడగానే వేశాను. మొదటి ప్రయత్నంలో బాగానే విసిరాను.. కానీ టెక్నికల్ ప్రాబ్లమ్ వల్ల ఆ త్రో మిస్ అయింది. మళ్లీ నన్ను నేను పుష్ చేసుకుని ప్రయత్నించాను. ఈ మెడల్ ప్రతి భారతీయుడిది. దేశానికి అంకితమిస్తున్నాను" అని నీరజ్ పేర్కొన్నాడు.