ఫుట్బాల్ దిగ్గజం లియోనల్ మెస్సీకి ప్రపంచమంతటా ఫ్యాన్స్ ఉన్నారు. అతని ఆట తీరును అభిమనించే వారు అతని స్టైల్కు కూడా ఫిదా అవుతుంటారు. అయితే మైదానంలో తన ఆటతో అభిమానులను మాయ చేయగల సత్తా ఉన్న మెస్సీనే తన మ్యాజిక్తో బోల్తా కొట్టించాడు ఓ మెజీషియన్‌. ఇంతకీ ఏం జరిగంటే..
ఫిఫా ప్రపంచ కప్లో విజయాన్ని సాధించిన తర్వాత ప్యారిస్‌ సెయింట్‌ జెర్మన్‌(పీఎస్ జీ) అనే క్లబ్‌కు మెస్సీ ప్రాతినిధ్యం వహిస్తున్నాడు. ఈ క్రమంలో గురువారం రాత్రి పీఎస్‌జీ ప్లేయర్స్‌ కోసం ప్యారిస్‌లో ఓ పార్టీ నిర్వహించారు. ఈ పార్టీకి మెస్సీతో పాటు ఇతర పీఎస్‌జీ ప్లేయర్లు హాజరయ్యారు. కాగా ఇదే పార్టీకి జూలిస్‌ డెయిన్‌ అనే మెజీషియన్‌ కూడా వచ్చాడు. ఆయన మెస్సీ దగ్గరికి వచ్చి ఓ కార్డ్‌ ట్రిక్‌ ప్లే మ్యాజిక్ షో చూపిస్తానన్నాడు. దానికి మెస్సీ సరేనన్నాడు.
అయితే మెస్సీని ఒక కార్డు సెలెక్ట్‌ చేసుకోవాలని.. కానీ అది ఏ కార్డు అనేది తనకు చూపించొద్దన్నాడు. అలా మెస్సీ ఏస్‌(A) కార్డును సెలెక్ట్‌ చేసుకున్నాడు. ఆ తర్వాత తన మ్యాజిక్ ట్రిక్‌తో మెస్సీ ఎంచుకున్న కార్డును మెజీషియన్‌ కరెక్టుగా చూపించడంతో పాటు అర్థం కాని భాషలో మాట్లాడాడు. ఆ సమయంలో మెస్సీ భార్య ఆంటోనెల్లా కూడా అక్కడే ఉంది. ఇంగ్లీష్‌లో ఎలా చెప్పాలో తెలియక మెజీషియన్‌ పడుతున్న కష్టాన్ని చూసి మెస్సీ నవ్వుకున్నాడు. ప్రస్తుతం ఈ వీడియో నెట్టింట హల్చల్ చేస్తోంది. ఇది చూసిన మెస్సీ ఫ్యాన్స్ మెస్సీ అమాయకత్వాన్ని చూసి మురిసిపోయారు.
ఇక కెరీర్ విషయానికి వస్తే.. మెస్సీ ఫిఫా వరల్డ్‌కప్‌ అందించిన తర్వాత ఆటకు రిటైర్మెంట్ ఇస్తాడని అంతా భావించారు. కానీ మరికొన్ని రోజులు తన ఆటను కొనసాగిస్తానని మెస్సీ తన మనసులోని మాటను చెప్పాడు. అయితే గత రెండు రోజులుగా ఆయన త్వరలోనే రిటైర్మెంట్ ప్రకటించనున్నట్లు పలు కథనాలు వస్తున్నాయి. అందుకు అనుగుణంగా మెస్సీ కూడా అర్జెంటీనా జెర్సీని పట్టుకొని.. 'ఇక ముగిసింది' అన్నట్లుగా హింట్‌ ఇవ్వడం పలు అనుమానాలకు దారి తీస్తోంది.
