ఆ పడకలు యాంటీ-సెక్స్​ కాదు.. సాక్ష్యం ఇదిగో!

ఒలింపిక్​ గ్రామంలో ఏర్పాటు చేసిన పడకలు యాంటీ-సెక్స్​ అని రకరకాల రూమర్లు రావడంపై అంతర్జాతీయ ఒలింపిక్​ కమిటీ(IOC) స్పందించింది. అథ్లెట్ల కోసం ఏర్పాటు చేసిన బెడ్లు మన్నిక కలిగినవని స్పష్టం చేసింది. మరోవైపు ఐర్లాండ్​ చెందిన జిమ్నాస్టిక్​ క్రీడాకారుడు కూడా సదరు వార్తలను కొట్టివేశాడు. తనకు కేటాయించిన బెడ్​పై జంప్​ చేస్తున్న వీడియోను షేర్​ చేశాడు.

టోక్యో ఒలింపిక్స్(Tokyo Olympics)​లో పాల్గొనేందుకు వచ్చే అథ్లెట్ల కోసం రీసైక్లింగ్​కు వీలుండే కార్డ్​బోర్డ్​తో తయారు చేసిన బెడ్లను ఉపయోగించనున్నారు. అయితే కరోనా కారణంగా ఒలింపిక్స్​లో శృంగారం కట్టడికి నిర్వాహకులు ఈ విధంగా చర్యలు చేపట్టారని ఇటీవల ప్రచారం జరిగింది. ఈ రూమర్లపై అంతర్జాతీయ ఒలింపిక్​ కమిటీ(IOC) స్పందించింది. ఒలింపిక్​ గ్రామంలో క్రీడాకారుల కోసం ఏర్పాటు చేసిన బెడ్లు మన్నిక కలిగినవని ఐఓసీ భరోసా ఇస్తూ సోమవారం ఓ ప్రకటన చేసింది.

మరోవైపు ఒలింపిక్​ గ్రామంలో ఏర్పాటు చేసిన పడకలు మన్నికగా లేవనే వార్తలను ఐర్లాండ్​కు చెందిన జిమ్నాస్టిక్ ఆటగాడు​ రైస్ మెక్‌క్లెనాఘన్ కొట్టిపారేశాడు. తనకు కేటాయించిన బెడ్​పై జంప్​ చేస్తున్న వీడియోను ట్విట్టర్​లో షేర్​ చేశాడు.

"ఇవి యాంటీ సెక్స్​ పడకలు అన్నది అవాస్తవం. ఇదొక ఫేక్​ న్యూస్.. ఫేక్​ న్యూస్​.."- మెక్​క్లెనాఘన్​, ఐర్లాండ్​ జిమ్నాస్టిక్​ ​

ఈ ట్వీట్​పై స్పందించిన అంతర్జాతీయ ఒలింపిక్​ కమిటీ(IOC) ఐర్లాండ్​ జిమ్నాస్టిక్​ క్రీడాకారుడు మెక్​క్లెనాఘన్​కు ధన్యవాదాలు తెలిపింది. ఒలింపిక్​ గ్రామంలో ఏర్పాటు చేసిన పడకల గురించి వచ్చిన రూమర్లను కొట్టివేసినందుకు ఐఓసీ హర్షం వ్యక్తం చేసింది.

జులై 23 నుంచి ప్రారంభంకానున్న టోక్యో ఒలింపిక్స్​లో 33 క్రీడల కోసం 42 వేదికలు.. 339 పతకాలను సిద్ధం చేసింది జపాన్​ ప్రభుత్వం. ఈ మెగాఈవెంట్​లో దాదాపుగా 11,500 క్రీడాకారులు పాల్గొననుండగా.. అందులో 51 శాతం పురుషులు 49 శాతం మహిళలు ఉన్నారు.

ఇదీ చూడండి..Tokyo Olympics: ఒలింపిక్స్​కు ముందు పెరుగుతున్న కరోనా కేసులు