ప్రపంచ అథ్లెటిక్స్‌ రిలే ఛాంపియన్‌షిప్స్‌లో అత్యుత్తమ ప్రదర్శనతో టోక్యో ఒలింపిక్స్కు అర్హత సాధించాలని తపనపడ్డ హిమదాస్‌, ద్యుతి చంద్ లాంటి స్టార్‌ అథ్లెట్లతో కూడిన భారత మహిళల 4×100మీ. రిలే జట్టు ఆశలపై కరోనా నీళ్లు చల్లింది. పోలెండ్‌లోని సిలేసియాలో శనివారం ఆరంభమయ్యే ఈ ఒలింపిక్స్ అర్హత ఛాంపియన్‌షిప్స్‌ కోసం నెదర్లాండ్స్‌ రాజధాని ఆమ్‌స్టర్‌డామ్‌ మీదుగా భారత మహిళల రిలే జట్టుతో పాటు పురుషుల 4×400మీ అథ్లెట్ల బృందం ప్రయాణించాల్సి ఉంది.
ప్రపంచ రిలే ఛాంపియన్స్కు భారత్ దూరం
పోలెండ్లో జరగబోయే పోటీలకు వెళ్లే దారిలేకపోవడం వల్ల భారత మహిళల, పురుషుల అథ్లెట్ల బృందం.. ప్రపంచ రిలే ఛాంపియన్షిప్స్కు దూరమైంది. దీంతో ఒలింపిక్స్కు అర్హత సాధించే అవకాశాన్ని కోల్పోయింది.
ద్యుతి చంద్ హిమాదాస్
గురువారం తెల్లవారుజామున విమానంలో వాళ్లు ఆమ్‌స్టర్‌డామ్‌కు బయల్దేరాలి. కానీ వైరస్‌ ఉద్ధృతి కారణంగా భారత్ నుంచి వచ్చే విమానాలను అనుమతించట్లేదని సోమవారం సాయంత్రమే ఆ దేశం ప్రకటించింది. ఈ నేపథ్యంలో భారత్ నుంచి పోలెండ్‌కు నేరుగా విమానం లేకపోవడం వల్ల ఇతర ప్రత్యామ్నాయ మార్గాల కోసం ప్రయత్నించిన భారత అథ్లెటిక్స్‌ సమాఖ్య (ఏఎఫ్‌ఐ).. చివరకు పోటీల నుంచి తప్పుకుంటున్నట్లు ప్రకటించింది.
ఈ ఛాంపియన్‌షిప్స్‌లో తొలి ఎనిమిది స్థానాల్లో నిలిచే రిలే జట్లు నేరుగా ఒలింపిక్స్కు అర్హత సాధిస్తాయి. మహిళల 4×100మీ. జట్టులో హిమ, ద్యుతి, ధనలక్ష్మీ, అర్చన, ధనేశ్వరి, హిమశ్రీ ఉన్నారు. ఇప్పటికే ఫిట్‌నెస్‌ లేని కారణంగా మహిళల 4×400మీ. రిలే జట్టు ఈ ఛాంపియన్‌షిప్స్‌ నుంచి తప్పుకుంది.