టోక్యో ఒలింపిక్స్ మళ్లీ వాయిదా పడతాయా?

టోక్యో ఒలింపిక్స్​ను మరో ఏడాది పాటు వాయిదా వేయడం అసాధ్యమని చెప్పారు నిర్వహణ కమిటీ అధ్యక్షుడు యోషిరొ మోరి. మెగాక్రీడల్ని వచ్చే ఏడాది కచ్చితంగా నిర్వహిస్తామని స్పష్టం చేశారు. అయితే కరోనా ప్రభావం తీవ్రమవుతుండటం పలు సందేహాలను రేకెత్తిస్తుంది.

కరోనా ప్రభావం వల్ల ఈ జులై నుంచి జరగాల్సిన ఒలింపిక్స్.. వచ్చే ఏడాదికి వాయిదా పడ్డాయి. అయితే టోక్యోలో నిర్వహించే ఈ మెగాక్రీడల్ని మరోసారి వాయిదా వేయడం అసాధ్యమని స్పష్టం చేశారు నిర్వహణ కమిటీ అధ్యక్షుడు యోషిరొ మోరి. 2021 జులై 23న ఎట్టి పరిస్థితిలోనైనా ప్రారంభమవుతాయని అన్నారు. వాయిదా వ్యవధి పెరిగితే సాంకేతిక ఇబ్బందులు ఎదుర్కొవలసి వస్తుందని అన్నారు. ఈ విషయాల్ని ఓ వార్త ఏజెన్సీ ఇంటర్వ్యూలో వెల్లడించారు.

ఒలింపిక్స్ రెండేళ్ల వాయిదాపై జపాన్ ప్రధాని షింజో అబెతో తాను మాట్లాడానని చెప్పిన మోరి.. ఆయన ఏడాది సమయం సరిపోతుందని చెప్పినట్లు పేర్కొన్నారు.

కరోనా ప్రభావం తగ్గితే ఒలింపిక్స్​ను వచ్చే ఏడాది ఘనంగా జరపాలని నిర్వాహక కమిటీ భావిస్తున్నట్లు సంబంధిత అధికారులు తెలిపారు. అయితే వైరస్ తీవ్రత రోజురోజుకు పెరుగుతుండటం వల్ల 2021 జులైలోనైనా ఈ క్రీడల నిర్వహణ​ సాధ్యమవుతుందా అన్న అనుమానాలు కొందరు వ్యక్తం చేస్తున్నారు.

ఇదీ చూడండి : 'చెన్నై ధోనీని తీసుకోవడం నాకు బాధ కలిగించింది'