HS Prannoy Match Today : ప్రపంచ బ్యాడ్మింటన్ ఛాంపియన్‌షిప్‌లో భారత స్టార్ షట్లర్‌ హెచ్ ఎస్ ప్రణయ్‌అదరగొట్టాడు. పురుషుల సింగిల్స్ క్వార్టర్ ఫైనల్‌లో విజయంతో భారత్‌కు పతకాన్ని ఖాయం చేశాడు. కొపెన్‌హెగెన్‌ వేదికగా శుక్రవారం జరిగిన ఈ మ్యాచ్‌లో డెన్మార్క్‌కి చెందిన డిఫెండింగ్ ఛాంపియన్ విక్టర్ అక్సెల్‌సెన్‌ను 13-21, 21-15, 21-16 తేడాతో చిత్తు చేసిన ప్రణయ్ సెమీస్‌లోకి దూసుకెళ్లాడు. ఇక శనివారం జరిగే సెమీస్‌లో ప్రణయ్ థాయ్‌లాండ్‌ ఆటగాడితో తలపడనున్నాడు. మరోవైపు పురుషుల డబుల్స్‌ క్వార్టర్ ఫైనల్‌లో భారత స్టార్ ద్వయంసాత్విక్‌-చిరాగ్‌ జోడీ ఓటమిపాలైంది. రస్ముస్సెన్‌-ఆస్ట్రప్‌ చేతిలో 21-18, 21-19 తేడాతో భారత ద్వయం ఓడిపోయింది.
Prannoy BWF World Championships 2023 :ప్రారంభ గేమ్హోరాహోరీగా సాగినప్పటికీ.. అక్సెల్సన్‌ నిలకడగా ఆధిక్యంలోనే ఉన్నాడు. ఇక 12-17తో వెనుకబడ్డ దశలో ప్రణయ్ వేగం పుంజుకుని వరుసగా అయిదు పాయింట్లతో స్కోరు సమం చేసినప్పటికీ.. చివరికి గేమ్ ప్రత్యర్థికే సొంతమైంది. అయితే నిరాశ చెందని ప్రణయ్ రెండో గేమ్లో తన సత్తా చాటేందుకు ప్రయత్నించాడు.
అయితే రెండో గేమ్ మొదట్లోనే ప్రణయ్ 1-7తో వెనుకబడటం వల్ల ఇక అతడి పనైపోయినట్లే అని అనిపించింది. కానీ ప్రణయ్ పట్టు వదల్లేదు. ఆఖరి వరకు గొప్పగా పోరాడాడు. 15-15తో స్కోరు సమం చేశాడు. ఇక 17-17 వద్ద ప్రణయ్ దూకుడుగా ఆడి అక్సెల్సన్‌కు షాకిచ్చాడు. వరుసగా మూడు పాయింట్లను సాధించి గేమ్ విజయానికి చేరువయ్యాడు. ఇక అక్సెల్సన్‌ అతణ్ని అందుకునే ప్రయత్నం చేసినా ఫలితం లేకపోయింది. దీంతో నిర్ణయాత్మక మూడో గేమ్ అనూహ్యంగా ఏకపక్షమైంది. అయితే అప్పటికే అలసిపోయిన అక్సెల్సన్‌.. ప్రణయ్ దూకుడు ముందు నిలవలేకపోయాడు. 5-5 వద్ద విజృంభించిన అతను.. వరుసగా పాయింట్లు కొల్లగొడుతూ 16-6తో పైచేయి సాధించాడు. ఆ తర్వాత ప్రణయ్ విజయం లాంఛనమే అయింది.