భారత స్ప్రింటర్ ద్యుతి చంద్కు అరుదైన గౌరవం లభించింది. ప్రపంచంలో అత్యధిక మందిని ప్రభావితం చేసే వంద మందిని ప్రముఖుల జాబితాలో స్థానం దక్కించుకుంది. ఏటా టైమ్ మ్యాగజైన్ విడుదల చేసే టాప్-100 జాబితాతో కొనసాగింపుగా టైమ్100 నెక్స్ట్ పేరుతో రూపొందించే లిస్ట్లో చోటు సంపాదించింది ద్యుతి.
ఈ గౌరవం పట్ల ఆనందం వ్యక్తం చేసింది ద్యుతి చంద్.
"టైమ్ మ్యాగజైన్ నన్ను గుర్తించి ఈ గౌరవాన్ని ఇచ్చినందుకు ఎంతో ఆనందంగా ఉంది. లింగ సమానత్వాన్ని గట్టిగా నమ్ముతా. క్రీడల్లో బాలికలు, మహిళల హక్కుల కోసం నా పోరాటాన్ని ఇలాగే కొనసాగిస్తా. సమాజంలో వారిపై జరుగుతున్న అకృత్యాలపై పోరాడతా" - ద్యుతి చంద్, భారత స్ప్రింటర్
భవిష్యత్ తరాలకు ఆదర్శంగా నిలుస్తూ.. ప్రజలను ప్రభావితం చేసే టాప్-100 మంది రైజింగ్ స్టార్స్ను టైమ్ మ్యాగజైన్ ఏటా ఎంపిక చేస్తుంది. వ్యాపారం, వినోదరంగం, క్రీడలు, రాజకీయాలు, ఆరోగ్యం, సైన్స్ తదితర రంగాల్లో రాణించిన ప్రముఖులకు ఈ లిస్టులో చోటు కల్పిస్తుంది. ఈ జాబితా పాటు టైమ్ 100 నెక్స్ట్ జాబితానూ విడుదల చేస్తుంది.
ఇండోనేసియా జకర్తా వేదికగా జరిగిన ఆసియా క్రీడల్లో ద్యుతి చంద్ పతకాలు సాధించింది. 100, 200 మీటర్ల రేసులో రెండు రజతాలు నెగ్గింది. నాపోలీ వేదికగా జరిగిన యూనివర్శేడ్ టోర్నీలోనూ స్వర్ణం నెగ్గి.. ఈ ఘనత సాధించిన భారత తొలి స్ప్రింటర్గా రికార్డు సృష్టించింది.
ఇదీ చదవండి: టాస్ గెలిచిన బంగ్లా.. భారత్ బౌలింగ్
