BWF Ranking Mens Doubles 2023 :భారత బ్యాడ్మింటన్‌లో ఎవరూ అందుకోలేని ఎత్తులకు చేరుకుంటూ.. మునుపు ఎవరూ వెళ్లని స్థానాలకు వెళుతూ రికార్డుల మీద రికార్డులు నెలకొల్పారు భారత బ్యాడ్మింటన్ ప్లేయర్లు సాత్విక్ సాయిరాజ్, చిరాగ్ శెట్టి. 'బ్రదర్స్‌ ఆఫ్‌ డిస్ట్రక్షన్‌'గా పేరు పొందిన ఈ బ్యాడ్మింటన్ ద్వయం.. తాజాగా ప్రపంచ నంబర్‌వన్‌ ర్యాంకు ఖరారు చేసుకుని ఈ ఘనత సాధించిన తొలి భారత జోడీగా చరిత్ర సృష్టించారు. వీరి నంబర్ వన్ స్థానం మంగళవారం అధికారికం కానుంది.
Satwik Chirag Asian Games :ఇటీవల జరిగిన ఆసియా క్రీడల్లో డుబుల్స్ విభాగంలో స్వర్ణం సాధించింది ఈ జోడీ. అయితే ఐదేళ్ల ముందు వరకు సాత్విక్-చిరాగ్ ఒక సాధారణ జంట మాత్రమే! కానీ స్వల్ప కాలంలోనే అసాధారణంగా ఎదిగి.. వరల్డ్ ర్యాంకును సొంతం చేసుకోవడం అనూహ్యం. వీళ్ల ప్రయాణంలో.. జాతీయ కోచ్‌ పుల్లెల గోపీచంద్‌, డబుల్స్‌ కోచ్‌ మతియాస్‌ బో.. సాత్విక్, చిరాగ్‌ల తల్లిదండ్రులు ఈ ప్రయాణంలో కీలకంగా నిలిచారు.
Chirag Shetty And Satwiksairaj Ranking :బ్యాడ్మింటన్‌లో డబుల్స్‌ అత్యంత క్లిష్టమైన ఈవెంట్. ఎంతో సరళత, వేగం, టెక్నిక్‌, సమన్వయం, ఏకాగ్రత ఉంటే తప్ప ముందుకు కదలలేరు. సంవత్సరాల తరబడి చైనా, మలేసియా ఆటగాళ్లకు పెట్టని కోటగా డబుల్స్‌ ఈవెంట్ ఉంది. అందులో ఓ భారత జోడీ సంచలన విజయాలు సాధించడం, నంబర్‌వన్‌గా ఎదగడం చాలా కష్టం. కానీ ఒక్కసారిగా దూసుకొచ్చిన సాత్విక్, చిరాగ్ ద్వయం.. గత కొన్నేళ్లుగా సంచలన విజయాలతో ముందుకు సాగుతోంది. గతేడాది టాప్‌-10లో అన్ని జోడీలను ఓడించి కొరకరాని కొయ్యగా మారింది.