ఆదివారం మాంచెస్టర్‌ వేదికగా భారత్ - పాక్ మధ్య జరిగిన పోరులో కోహ్లీసేన 89 పరుగులతో గెలుపొందిన విషయం తెలిసిందే. ఈ సందర్భంగా పాకిస్థాన్ సంతతికి చెందిన బ్రిటిష్ బాక్సర్ అమిర్‌ఖాన్‌ ట్విట్టర్లో సంచలన కామెంట్లు చేశాడు.
ఆమిర్ - భారత బాక్సర్ నీరజ్ " ఐసీసీ ప్రపంచకప్ 2019లో టీమిండియా చేతిలో పాక్ పరాభవం చెందింది. ఆ ఓటమికి ప్రతీకారంగా సౌదీ అరేబియాలో జులై 12న జరగనున్న బాక్సింగ్ ఫైట్లో భారత ఆటగాడు నీరజ్ గోయత్ను ఓడిస్తాను ".
-- ఆమిర్ ఇక్బాల్ ఖాన్, పాక్ సంతతికి చెందిన బ్రిటిష్ బాక్సర్
ఆమిర్ వ్యాఖ్యలపై నీరజ్ గోయత్ తనదైన శైలిలో దీటుగా బదులిచ్చాడు.
" అలాగే కలలు కంటూ ఉండు ఆమిర్.. నువ్వు నా విజయానికి, భారత గెలుపునకు సాక్ష్యంగా నిలుస్తావు ".
--నీరజ్ గోయత్, భారతీయ బాక్సర్
అంతేకాకుండా పాకిస్థాన్ క్రికెట్ జట్టుకు కొన్ని ఫిట్నెస్ సలహాలు ఇస్తానని తెలిపాడు ఆమిర్.
" ఆహారం, వ్యాయామం, డైట్ విషయంలో ఎలాంటి నియమాలు పాటించాలో పాక్ ఆటగాళ్లకు వివరిస్తాను. పాకిస్థాన్ జట్టుకు చాలా నైపుణ్యం ఉంది కాని కొంచెం బలంగా మారి పరిస్థితులకు తగ్గట్టు ఆడాలి" అని ఆమిర్ వ్యాఖ్యానించాడు.
ఆమిర్ పుట్టి పెరిగింది మాంచెస్టర్‌లోని బాల్టన్ అయినా అతడి కుటుంబ మూలాలు పాకిస్థాన్‌లో ఉన్నాయి. దాని వల్లే అతడు పాక్ జట్టుకు మద్దతుగా నిలుస్తున్నాడు.
ప్రపంచకప్లో పాకిస్థాన్ ఇప్పటివరకు ఐదు మ్యాచ్‌లు ఆడగా... ఒకటి మాత్రమే గెలిచింది. మరో మ్యాచ్ ఫలితం తేలలేదు. ఫలితంగా మూడు పాయింట్లతో చివరి నుంచి 2వ స్థానంలో నిలిచింది. ఇక నుంచి ఆ జట్టు ఆడే అన్ని మ్యాచ్‌లు గెలిస్తే తప్ప సెమీస్‌కి చేరే అవకాశం లేదు. అందుకే సర్ఫరాజ్‌ సారథ్యం, ఆటగాళ్ల ప్రదర్శనపై సోషల్‌మీడియాలో విమర్శలు వెల్లువెత్తుతున్నాయి.
