Asian Games postponed: చైనాలో విజృంభిస్తున్న కరోనా మహమ్మారి ప్రభావం ఆసియా గేమ్స్పై పడింది. హంగ్జౌ నగరంలో ఈ ఏడాది సెప్టెంబర్లో నిర్వహించాల్సిన ఆసియా గేమ్స్-2022 వాయిదా పడ్డాయి. కొవిడ్-19 కేసులు పెరుగుతున్న కారణంగా 19వ ఎడిషన్ ఆసియా గేమ్స్ను ఆసియా ఒలింపిక్ కౌన్సిల్ వాయిదా వేసినట్లు చైనా అధికారిక మీడియా సీజీటీవీ తెలిపింది.
ఒలింపిక్స్ తర్వాత ఆసియా గేమ్స్ రెండో అతిపెద్ద క్రీడా ఈవెంట్. ఝెజియాంగ్ ప్రావిన్స్ రాజధాని హంగ్జౌ నగరంలో సెప్టెంబర్ 10-25 మధ్య ఈ క్రీడలు జరగాల్సి ఉంది. అయితే, చైనాలో కొద్ది రోజులుగా కరోనా కేసులు పెరుగుతున్నాయి. జీరో కొవిడ్ లక్ష్యంగా ప్రభుత్వం ఎన్ని చర్యలు తీసుకుంటున్నా.. ఫలితాన్నివ్వటం లేదు. హంగ్జౌకు సమీపంలోని షాంఘైలో రోజువారీ కేసులు భారీగా నమోదవుతుండటం ఆసియా గేమ్స్పైన ప్రభావం చూపినట్లు తెలుస్తోంది.