ఆల్‌ ఇంగ్లాండ్‌ ఛాంపియన్షిప్ రసవత్తరంగా సాగుతోంది. భారత్ స్టార్ బ్యాడ్మింటన్ ప్లేయర్ పీవీ సింధు తొలి రౌండ్లోనే నిష్క్రమించింది. మరో ఆటగాడు శ్రీకాంత్‌ పరాజయం పాలయ్యాడు. హెచ్ ఎస్ ప్రణయ్‌ కూడా వెనుదిరిగాడు. ఎన్నో ఆశలతో వెళ్లిన యువ సంచలనం లక్ష్యసేన్‌ కథ ముగిసింది. పురుషుల డబుల్స్‌లో స్టార్ జోడీ సాత్విక్‌-చిరాగ్‌ జంట ఓడింది. ఇలా అగ్రశ్రేణి క్రీడాకారులు వరుసగా ఇంటిముఖం పడుతున్నా.. భారత ఆశలను మోస్తూ యువ జంట గాయత్రి గోపీచంద్‌, ట్రీసా జాలీ సత్తా చాటుతోంది.
ఆల్‌ ఇంగ్లాండ్‌ ఛాంపియన్షిప్ మహిళల డబుల్స్‌లో సెమీఫైనల్‌కు దూసుకెళ్లింది. ఈ ప్రతిష్టాత్మక టోర్నీలో వరుసగా రెండో ఏడాది ఈ ఘనత సాధించింది. శుక్రవారం జరిగిన క్వార్టర్‌ఫైనల్ మ్యాచ్లో గాయత్రి- ట్రీసా జోడీ 21-14, 18-21, 21-12తో వెన్‌ మీ- ల్యూ షువాన్‌ (చైనా) జంటపై విజయం సాధించింది.
మరోవైపు పురుషుల సింగిల్స్‌లో భారత్ పోరాటం ముగిసింది. ప్రీక్వార్టర్స్‌లో కిదాంబి శ్రీకాంత్‌ 17-21, 15-21తో కొడయ్‌ నరవొక (జపాన్‌) చేతిలో, హెచ్.ఎస్.ప్రణయ్‌ 20-22, 21-15, 17-21తో ఆంథోనీ జింటింగ్‌ (ఇండోనేసియా) చేతిలో, లక్ష్యసేన్‌ 13-21, 15-21తో ఆండర్స్‌ ఆంథోన్సెన్‌ (డెన్మార్క్‌) చేతిలో పరాజయం చవిచూశారు.
గతేడాది చివరి నిమిషంలో ఆల్‌ ఇంగ్లాండ్‌ మెయిన్‌ డ్రాలో అడుగుపెట్టి రాణించిన గాయత్రి- ట్రీసా జోడీ.. ఈసారి రెట్టించిన ఉత్సాహంతో ఆడుతోంది. ఇప్పటికే తొలి రౌండ్లో ఏడో సీడ్‌.. ప్రిక్వార్టర్స్‌లో మాజీ నంబర్‌వన్‌ జోడీలకు షాకిచ్చింది. క్వార్టర్స్‌లో అత్యుత్తమ ఆటతీరుతో ఆకట్టుకుంది. చైనా జంటను చిత్తుచేసింది. 54 నిమిషాల మ్యాచ్లో ఆరంభం నుంచే దూకుడుగా ఆడిన గాయత్రి- ట్రీసా జోడీ.. 6-2తో మొదటి గేమ్‌ను మొదలుపెట్టింది. 6-6తో చైనా జంట పాయింట్లను సమం చేసినా పుంజుకుని 11-8తో పైచేయి సాధించింది. సూపర్ షాట్లు ఆడుతూ పాయింట్లు రాబట్టిన గాయత్రి- ట్రీసా జంట 18-12తో ముందంజ వేసింది. 21-14తో తొలి గేమ్‌ను గెలుచుకుంది.
రెండో గేమ్‌లోనూ 10-6తో ఆధిపత్యం ప్రదర్శించింది. వెన్‌- షువాన్‌ జోడీ పోటాపోటీగా ఆడింది. 13-15తో వెనుకంజలో ఉన్న స్థితి నుంచి 17-15తో ఆధిక్యం సంపాదించింది. ఆధిపత్యాన్ని కొనసాగిస్తూ 21-18తో రెండో గేమ్‌ నెగ్గింది. నిర్ణయాత్మక మూడో గేమ్‌ ఏకపక్షంగా సాగింది. గాయత్రి- ట్రీసా జోడీ వరుస పాయింట్లతో విజృంభించింది. 8-1తో గేమ్‌ను మొదలుపెట్టి 13-5తో ఆధిక్యం సంపాదించింది. చైనా జంటకు ఎలాంటి అవకాశం ఇవ్వకుండా 21-12తో విజయం సాధించింది.
