నీరజ్ స్వర్ణం అందుకున్న రోజు.. ఇకపై ప్రతి ఏటా

ప్రపంచ అథ్లెటిక్స్ ఛాంపియన్​షిప్ తన తదుపరి లక్ష్యమని ​ఒలింపిక్స్ గోల్డ్ మెడలిస్ట్ నీరజ్​ చోప్డా స్పష్టం చేశాడు. నీరజ్​ చోప్డా స్వర్ణం గెలిచిన ఆగస్టు 7న, ప్రతి ఏడాది జావెలిన్ త్రో పోటీలు నిర్వహిస్తామని ఏఎఫ్ఐ తీర్మానించింది.

టోక్యో ఒలింపిక్స్‌లో స్వర్ణం సాధించి, భారత అథ్లెటిక్స్‌ చరిత్రలో వందేళ్ల నిరీక్షణకు జావెలిన్ త్రోయర్ నీరజ్‌ చోప్డా తెరదించాడు. అలానే సరికొత్త అధ్యయాన్ని లిఖించాడు. వచ్చే ఏడాది అమెరికాలో జరిగే ప్రపంచ అథ్లెటిక్స్ ఛాంపియన్​షిప్​ తన తదుపరి లక్ష్యం అని ఇతడు స్పష్టం చేశాడు. అథ్లెటిక్స్ ఫెడరేషన్​ ఆఫ్ ఇండియా(ఏఎఫ్​ఐ) సన్మాన కార్యక్రమంలో ఈ విషయాన్ని వెల్లడించాడు.

తదుపరి లక్ష్యం అదే..

'నేను ఇప్పటికే ఆసియా గేమ్స్​లో స్వర్ణం సాధించాను. వచ్చే ఏడాది ప్రపంచ ఛాంపియన్​షిప్​లో స్వర్ణం సాధించటమే నా తదుపరి లక్ష్యం. అయితే ప్రపంచ ఛాంపియన్​షిప్​ ఒక్కోసారి ఒలింపిక్స్​ కంటే కష్టంగా ఉంటుంది. ఏషియన్ గేమ్స్, కామన్​ వెల్త్​ గేమ్స్, ఒలింపిక్స్​లో మరోసారి స్వర్ణం సాధించేందుకు తీవ్రంగా శ్రమిస్తాను' అని నీరజ్ చెప్పాడు.

2015లో కేరళలో జరిగిన జాతీయ పోటీల్లో తనకు ఐదోస్థానం దక్కినా.. ఏఎఫ్ఐ తనను నేషనల్ క్యాంప్​లో శిక్షణ కోసం ఎంపిక చేసిందని, అప్పటి నుంచే తన కెరీర్ మలుపు తిరిగిందని చెప్పుకొచ్చాడు నీరజ్​.

ప్రతి ఏటా ఆ రోజున పోటీలు..

ఆగస్టు 7.. ఒలింపిక్స్ అథ్లెటిక్స్​లో భారత్​ 100 ఏళ్ల కలను సాకారం చేసిన రోజు. ఎందుకంటే.. ఆ రోజే టోక్యో ఒలింపిక్స్​లో నీరజ్ చోప్డా స్వర్ణం సాధించింది. అయితే నీరజ్ చోప్డా గౌరవార్ధం.. ప్రతి ఏటా ఆగస్టు 7న దేశవ్యాప్తంగా జావెలిన్ త్రో పోటీలు నిర్వహించాలని అథ్లెటిక్స్ ఫెడరేషన్​ ఆఫ్ ఇండియా(ఏఎఫ్​ఐ) నిర్ణయించింది. ఈ విషయాన్ని ఏఎఫ్ఐ ఛైర్మన్ లలిత్ బానోత్ తెలిపారు.

"జావెలిన్ త్రో క్రీడను మరింత ప్రోత్సహించాలని అథ్లెటిక్స్ ఫెడరేషన్​ ఆఫ్ ఇండియా(ఏఎఫ్​ఐ) ప్రణాళిక కమిటీ నిర్ణయించింది. ప్రతి ఏటా ఆగస్టు 7న దేశవ్యాప్తంగా జావెలిన్ పోటీలు నిర్వహించాలని తీర్మానించింది" అని లలిత్ స్పష్టం చేశారు.

ఇవీ చదవండి: