'సుశీల్ ఘటనతో డబ్ల్యూఎఫ్​ఐ ప్రతిష్ఠ దిగజారింది'

భారత స్టార్ రెజ్లర్​ సుశీల్​ కుమార్​ ఘటనతో భారత రెజ్లింగ్​ సమాఖ్య ప్రతిష్ఠ దిగజారిందని డబ్ల్యూఎఫ్​ఐ కార్యదర్శి వినోద్ తోమర్​ తెలిపారు. వార్షిక కాంట్రాక్ట్​ నుంచి సుశీల్​ను తప్పించే అవకాశం ఉందా అన్న ప్రశ్నకు.. అలాంటిదేమీ లేదని పేర్కొన్నారు.

హత్య కేసు ఆరోపణలు ఎదుర్కొంటున్న భారత స్టార్ రెజ్లర్​ సుశీల్ కుమార్​పై భారత రెజ్లింగ్ సమాఖ్య(డబ్ల్యూఎఫ్​ఐ) స్పందించింది. ఈ పరిణామం భారత రెజ్లింగ్​ ప్రతిష్ఠను దెబ్బతీసిందని పేర్కొంది. టోక్యో ఒలింపిక్స్​కు ఈ సారి ఏకంగా 8 మంది అర్హత సాధించారు. ఈ ఆనంద సమయంలో సుశీల్​ సంఘటన.. భారత రెజ్లింగ్​కు మాయని మచ్చలాగా మారిందని డబ్ల్యూఎఫ్​ఐ వెల్లడించింది.

“సుశీల్​ సంఘటన భారత రెజ్లింగ్​ సమాఖ్య ప్రతిష్ఠను దెబ్బతీసింది. వారు బయట చేసే పనులతో మాకు ఎటువంటి సంబంధం లేదు. అతని భవిష్యత్​పై ఆందోళన చెందుతున్నాము. దీంతో పాటు ఫిబ్రవరిలో జరిగిన ఘటనతోనూ సమాఖ్య ప్రతిష్ఠ దిగజారిందని చెప్పొచ్చు. సమాజం ఇకపై రెజ్లర్లను గూండాలుగా భావిస్తుంది.”

-వినోద్ తోమర్, భారత రెజ్లింగ్ సమాఖ్య కార్యదర్శి.

హరియాణా రోహ్​తక్​ జిల్లాలోని జాట్​ జిల్లాలో కోచ్​ మనోజ్ మాలిక్​తో సహా ఐదుగురి హత్య కేసులో రెజ్లింగ్ కోచ్ సుఖ్వీందర్​ సింగ్ ప్రమేయముందని తేలింది. వ్యక్తిగత కక్ష్యతోనే వారిని అంతమొందిచినట్టు విచారణలో తెలిసింది. ఈ రెండు ఘటనలతో రెజ్లింగ్​ ప్రతిష్ఠకు దెబ్బ పడిందని డబ్ల్యూఎఫ్​ఐ కార్యదర్శి తెలిపారు.

దిల్లీలోని ఛత్రశాల్​ స్టేడియంలో మే 4న జరిగిన గొడవలో రెజ్లర్​ సుశీల్​ కుమార్ ప్రత్యక్షంగా పాల్గొన్నట్లు ఆరోపణలు ఉన్నాయి. ఈ దాడుల్లో సాగర్​ రానా అనే 23 ఏళ్ల మల్లయోధుడు ప్రాణాలొదిలాడు. అప్పటి నుంచి సుశీల్​ జాడ కోసం పోలీసులు వెతుకుతున్నారు. ఇక లాభం లేదని భావించిన పోలీసులు.. ఏకంగా సుశీల్​ కోసం లుక్​ ఔట్​ నోటీస్​ జారీ చేశారు.

సుశీల్​ అంతర్జాతీయ కెరీర్​ భారత్​లో పలువురికి ఆదర్శంగా నిలిచింది. చాలా మంది అతని ప్రేరణతో రెజ్లింగ్​ను కెరీర్​గా ఎంచుకున్నారు. పల్లెటూరి నుంచి అంతర్జాతీయ స్థాయికి ఎదిగిన అతని నేపథ్యం స్ఫూర్తిదాయకం. ఒలింపిక్స్​లో రెండు పతకాలు సాధించిన ఏకైక రెజ్లర్​ సుశీల్. 2008 బీజింగ్​ ఒలింపిక్స్​లో కాంస్య పతకం సాధించి.. రెజ్లింగ్​లో 56 ఏళ్ల నిరీక్షణకు తెరదించాడు. అతన్ని ఆదర్శంగా తీసుకొని తర్వాతి రోజుల్లో యోగేశ్వర్​ దత్​, గీత, బబిత ఫోగట్​, వినేష్ ఫోగట్, సాక్షి మాలిక్, భజరంగ్ పూనియా, రవి దహియా, దీపక్ పూనియా వంటి రెజ్లర్లు వచ్చారు.

వార్షిక కాంట్రాక్ట్​ నుంచి తప్పిస్తుందా?

డబ్ల్యూఎఫ్​ఐ ప్రకారం సుశీల్​ ప్రస్తుతం ఏ గ్రేడ్​ కాంట్రాక్ట్​లో ఉన్నాడు. అతనికి ఏడాదికి రూ.30 లక్షలు జీతంగా లభిస్తుంది. అయితే ఈ కాంట్రాక్ట్​ నుంచి సుశీల్​ను తప్పించే అవకాశం ఉందా అని అడిగిన ప్రశ్నకు.. అలాంటిదేమీ లేదని తెలిపారు వినోద్ తోమర్.

ఇదీ చదవండి:'మిగిలిన ఐపీఎల్​ మ్యాచ్​ల్లో మా ఆటగాళ్లు ఆడకపోవచ్చు!'