ఒలింపిక్స్ క్వాలిఫయింగ్లో భాగంగా భారత్-పాక్ మధ్య మ్యాచ్లను ఎక్కడ నిర్వహించాలో ఇంకా ప్రణాళికలు రచించలేదనిఅంతర్జాతీయ హాకీ ఫెడరేషన్(ఎఫ్ఐహెచ్) తెలిపింది. రెండు దేశాల మధ్య ప్రస్తుత పరిస్థితుల దృష్ట్యా యూరప్లో మ్యాచ్ నిర్వహించేందుకు ప్రయత్నాలు చేస్తున్నట్లు పాక్ చెప్పడాన్ని ఖండించింది ఎఫ్ఐహెచ్.
"భారత్, పాకిస్థాన్ మ్యాచ్లను యూరప్లో నిర్వహించేందుకు ప్రణాళికలు ఇంకా సిద్ధం చేయలేదు. అయితే వాటిపై పాకిస్థాన్ హాకీ ఫెడరేషన్ చెప్పిన దానిలో నిజం లేదు. అది తప్పుడు వార్త."
-- అంతర్జాతీయ హాకీ ఫెడరేషన్.
ఒలింపిక్స్ క్వాలిఫయర్లుగా ఎవరెవరు ప్రత్యర్థులుగా బరిలోకి దిగుతారనేది సెప్టెంబర్ 9న జరిగే డ్రాలో తేలనుంది. ఈ డ్రా స్విట్జర్లాండ్ ల్యుసాన్నేలోని ఎఫ్ఐహెచ్ ప్రధాన కార్యాలయంలో జరుగుతుంది.14 జట్ల పేర్లతో 2020 టోక్యో ఒలింపిక్స్ కోసం డ్రా తీస్తారు. రెండు జట్లు తలపడినప్పుడు ఏ దేశజట్టు మెరుగైన ర్యాంక్లో ఉంటే ఆ దేశం మ్యాచ్కు ఆతిథ్యం వహిస్తుంది. ప్రపంచ ర్యాంకింగ్స్లో టాప్-8లో నిలిచిన దేశాలు ఈ మ్యాచ్లను నిర్వహిస్తాయి.
ఒలింపిక్ క్వాలిఫయర్స్ మెన్స్, ఉమెన్స్ జట్ల మ్యాచ్లు అక్టోబర్ చివరి వారంలో లేదా నవంబరు మొదటి వారంలో భారత్లో జరగనున్నాయి. ఎఫ్ఐహెచ్ హాకీ ఒలింపిక్ క్వాలిఫయర్లో రెండు దేశాలు రెండేసి మ్యాచ్లు ఆడతాయి. కాంటినెంటల్ ఛాంపియన్షిప్, ఓషియానిక్ కప్లో సాధించిన ర్యాంక్ల ఆధారంగా జట్లను రెండు భాగాలుగా విడదీస్తారు.
ప్రపంచ హాకీ ర్యాంకింగ్స్లో భారత్ 5వ స్థానం, పాకిస్థాన్ 17వ స్థానంలో ఉంది. 2016 రియో ఒలింపిక్స్కు పాక్ జట్టు అర్హత సాధించలేకపోయింది.
