ఒలింపిక్ టెస్ట్ ఈవెంట్లో భారత పురుషుల హాకీ జట్టు ఫైనల్కు వెళ్లింది. జపాన్పై 6-3 తేడాతో ఘనవిజయం సాధించింది. మన్దీప్ సింగ్ హ్యాట్రిక్ గోల్స్తో సత్తాచాటాడు. గుర్సహిబిజిత్ సింగ్, నీలకంఠ శర్మ, నీలమ్ సంజీప్ చెరో గోల్తో ఆకట్టుకున్నారు.
మొదటి నుంచి దూకుడుగా ఆడిన భారత ఆటగాళ్లు జపాన్పై ఒత్తిడి తీసుకొచ్చారు. తొలి క్వార్టర్లోనే మూడు గోల్స్తో విజృంభించారు. నీలకంఠ శర్మతో మొదలైన ఈ విధ్వంసం.. నీలమ్ సంజీప్, మన్దీప్ సింగ్తో ముగిసింది.
రెండో క్వార్టర్ ప్రారంభంలోనే జపాన్ గోల్ చేసినా.. ఆ ఆనందం ఎంతో సేపు నిలవలేదు. మరోసారి మన్దీప్ గోల్ చేసి భారత్ను 4-1 ఆధిక్యంలోకి తీసుకెళ్లాడు. ఆట సగం పూర్తికావడానికి ముందే మరోసారి బంతిని పోస్ట్లోకి పంపించి హ్యాట్రిక్ సాధించాడీ యువ ఆటగాడు.
జపాన్ మరో రెండు గోల్స్ సాధించినా.. టీమిండియా ఆటగాళ్లు పూర్తి ఆధిపత్యం వహించి జట్టుకు తిరుగులేని విజయాన్ని అందించారు. ఈ మ్యాచ్లో గెలుపుతో ఫైనల్లోకి అడుగుపెట్టింది భారత్. బుధవారం జరిగే తుదిపోరులో న్యూజిలాండ్తో తలపడనుంది. ఇంతకుముందు మ్యాచ్లో కివీస్పై భారత్ కొద్దిలో ఓడిపోయింది.
ఇవీ చూడండి.. విలియమ్సన్, ధనంజయల బౌలింగ్ యాక్షన్పై ఫిర్యాదు