UEFA 2020: రొనాల్డో కోకాకోలా.. పోగ్బా బీర్ బాటిల్

మరో ఫుట్​బాల్ ఆటగాడు పాల్ పోగ్బా(Paul Pogba).. రొనాల్డో దారిలోనే నడిచాడు. యూరో కప్​ ప్రెస్​మీట్ సందర్భంగా టేబుల్​పై ఉన్న బీర్ బాటిల్​ను తీసి కింద పెట్టేశాడు.

మరో ఫుట్‌బాల్‌ క్రీడాకారుడు క్రిస్టియానో రొనాల్డో(Cristiano Ronaldo) దారిలో నడిచాడు. ప్రెస్‌మీట్‌ సందర్భంగా ఫ్రాన్స్‌ ఫుట్‌బాల్‌ స్టార్‌ పాల్‌ పోగ్బా(Paul Pogba) తన ముందున్న ఓ బీర్‌ బాటిల్‌ను ఏకంగా కింద పెట్టేశాడు. యూఈఎఫ్‌ఏ యూరో 2020(UEFA 2020) టోర్నమెంట్‌లో భాగంగా జర్మనీపై గెలుపొందిన అనంతరం జరిగిన ప్రెస్‌మీట్‌లో ఈ ఘటన జరిగింది. ఈ టోర్నమెంట్‌లో భాగంగా.. బుధవారం ఫ్రాన్స్‌, జర్మనీ మధ్య ఫుట్‌బాల్‌ మ్యాచ్‌ సాగింది. ఈ ఉత్కంఠ పోరులో జర్మనీపై ఫ్రాన్స్‌ 1-0 తేడాతో విజయం సాధించింది.

మ్యాచ్‌ అనంతరం ఫ్రాన్స్‌ స్టార్‌ ప్లేయర్‌ పాల్‌ పోగ్బా ప్రెస్‌మీట్‌లో పాల్గొన్నాడు. అక్కడ టేబుల్‌పై కనిపించిన బీర్‌ బాటిల్‌ను తీసి కిందపెట్టేశాడు. టోర్నీ స్పాన్సర్లలో ఆ కంపెనీ కూడా ఒకటి. మద్యపానానికి దూరంగా ఉండే పోగ్బా ఈ విధంగా వ్యవహరించినట్లు తెలుస్తోంది. ఈ టోర్నీలో ఇలా వ్యవహరించిన రెండో క్రీడాకారుడు పోగ్బా. ఇంతకుముందు ప్రపంచవ్యాప్తంగా కోట్లాది అభిమానుల్ని సంపాదించుకున్న ఫుట్‌బాల్‌ దిగ్గజం క్రిస్టియానో రొనాల్డో తన ముందున్న రెండు కోకాకోలా బాటిళ్లను తీసి దూరంగా పెట్టాడు.