అభిమాని కోరికకు ఆశ్చర్యపోయిన ఫుట్​బాలర్ ఛెత్రి

తన అభిమాని అడిగిన కోరికకు ఆశ్చర్యపోయిన ఫుట్​బాలర్ ఛెత్రి.. ఆ విషయాన్ని ట్విట్టర్​లో పంచుకున్నాడు. ప్రస్తుతం ఈ స్క్రీన్​షాట్​ వైరల్​గా మారింది.

తమ ఆరాధ్య సెలబ్రిటీలు, ఆటగాళ్లు కనిపిస్తే సెల్ఫీనే, ఆటోగ్రాఫ్ అడుగుతారు. కానీ ఓ అభిమాని మాత్రం భారత ఫుట్​బాలర్​ సునీల్ ఛెత్రిని, నెట్​ఫ్లిక్స్ ఐడీ పాస్​వర్డ్ కావాలని కోరాడు. లాక్​డౌన్ తర్వాత పాస్​వర్డ్ మార్చుకోండి అని అతడికి సోషల్ మీడియాలో మెసేజ్ చేశాడు. దీనిని స్క్రీన్​షాట్​ తీసి ట్వీట్ చేసిన ఛెత్రి.. ఇతడి విజ్ఞప్తిని పరిగణలోకి తీసుకుంటానని రాసుకొచ్చాడు.

భారత ఫుట్​బాలర్ ఛెత్రికి అభిమాని చేసిన మెసేజ్

"జెర్సీ, ఫొటోపై ఆటోగ్రాఫ్, పోస్ట్​కు రిప్లై, పెంపుడు కుక్కలకు విషెస్ చెప్పమని వీడియోలు.. ఇవన్నీ అయిపోయాయి. ఇతడి ప్రాధాన్యత చూడండి. అయితే ఈ డిమాండ్​ను నేను పరిగణలోకి తీసుకోవాలని అనుకుంటున్నాను" -సునీల్ ఛెత్రి, ప్రముఖ ఫుట్​బాలర్

కొవిడ్-19ను అరికట్టటంలో భాగంగా ఆసియన్ ఫుట్​బాల్ కాన్ఫెడరేషన్​తో కలిసి పనిచేస్తున్నాడు ఛెత్రి. ఇందులో భాగంగా ప్రజలందరూ ఇంట్లోనే ఉండాలని విజ్ఞప్తి చేస్తున్నాడు.