కరోనా వైరస్‌ కారణంగా క్రీడలు రద్దవ్వడం వల్ల ఆటగాళ్లు తమ కుటుంబంతో కలిసి కాలక్షేపం చేస్తున్నారు. కొంతమంది క్రీడాకారులు మాత్రం తమ అభిమానులకు సమయాన్ని కేటాయిస్తున్నారు. సామాజిక మాధ్యమాల్లో వారు అడిగే ప్రశ్నలకు సమాధానమిస్తున్నారు.
తాజాగా భారత ఫుట్బాల్ కెప్టెన్‌ సునీల్ ఛెత్రి.. ట్విట్టర్‌లో ప్రశ్న-జవాబుల సెషన్‌లో పాల్గొన్నాడు. ఫుట్బాల్లో ఎన్నో రికార్డులు సాధించిన అతడిని ఐపీఎల్లో ఏ జట్టు తరఫున ఆడతావని ఓ నెటిజన్‌ ప్రశ్నించగా.. "నేను బెంగళూరు యువకుడిని. ఏ జట్టుకు ఆడతానో అర్థమై ఉంటుంది" అని సమాధానమిచ్చాడు. ఇండియన్‌ సూపర్ లీగ్‌లో ఛెత్రి బెంగళూరు ఎఫ్‌సీకి ప్రాతినిధ్యం వహిస్తున్నాడు. దీంతో ఆర్సీబీ తరఫునే ఆడతానిని పరోక్షంగా చెప్పాడు.