సౌథాంప్టన్ వేదికగా కివీస్తో జరుగుతున్న డబ్ల్యూటీసీ ఫైనల్లో టీమ్ఇండియా కట్టుదిట్టమైన బౌలింగ్ చేస్తోంది. టీ విరామ సమయానికి న్యూజిలాండ్ వికెట్లేమీ నష్టపోకుండా 21 ఓవర్లకు 36 పరుగులు మాత్రమే చేసింది. క్రీజులో ఓపెనర్లు లాథమ్(17*), కాన్వే(18*) ఉన్నారు.
పేస్ హైలైట్..
బ్యాటింగ్కు దిగిన సమయంలో న్యూజిల్యాండ్ ఓపెనర్లు ఆత్మవిశ్వాసంతో కనపడ్డారు. ఆరంభంలోనే బౌండరీలు కూడా కొట్టారు. కానీ ఆ తర్వాత భారత బౌలర్లు ఇషాంత్, బుమ్రా కట్టుదిట్టంగా బౌలింగ్ వేశారు. ఆ తర్వాత బంతిని అందుకున్న షమీ.. ఓపెనర్ల పని మరింత కష్టంగా మార్చాడు. నిప్పులు చెరిగే బంతులతో బ్యాట్స్మెన్ను ముప్పుతిప్పలు పెట్టాడు. కొద్ది ఓవర్లే వేసినప్పటికీ.. ఆశ్విన్ కూడా ఆకట్టుకున్నాడు. వికెట్లేమీ పడనప్పటికీ.. టీ విరామం వరకు బౌలింగ్ పరంగా టీమ్ఇండియా మంచి ప్రదర్శనే చేసిందని చెప్పుకోవాలి.
అయోమయం..!
న్యూజిలాండ్ బ్యాంటింగ్ సమయంలో ఆట కొంతసేపు ఆగిపోయింది. వర్షం పడుతోందని చెప్పి అంపైర్లు ఆటను నిలిపివేశారు. కవర్లు కూడా పిచ్ మీదకు వచ్చాయి. కానీ అవి చినుకులేనని టీమ్ఇండియా ఆటగాళ్లు మైదానంలో ఉండిపోయారు. కొద్ది నిమిషాల్లోనే న్యూజిలాండ్ ఓపెనర్లు మళ్లీ మైదానంలోకి అడుగుపెట్టారు.
అంతకుముందు టీమ్ఇండియా 217 పరుగులకు ఆలౌటైంది. ఓవర్నైట్ స్కోరుకు మరో 71 పరుగులు జోడించి మిగతా 7 వికెట్లను కోల్పోయింది. ఆట ప్రారంభించిన టీమ్ఇండియా.. కాసేపటికే కెప్టెన్ కోహ్లీ వికెట్ను కోల్పోయింది. అద్భుతమైన బంతితో జేమీసన్.. విరాట్ను ఎల్బీగా పెవిలియన్ చేర్చాడు. తర్వాత క్రీజులోకి వచ్చిన రిషభ్ పంత్ కూడా ఆకట్టుకోలేకపోయాడు. 22 బంతులాడి కేవలం 4 పరుగులే చేసిన పంత్ అనవసరమైన షాట్ ఆడి జేమీసన్ బౌలింగ్లో ఔట్ అయ్యాడు. మరో బ్యాట్స్మన్ అజింక్య రహానె.. సంయమనం ప్రదర్శించాడు. అర్ధ సెంచరీకి చేరువైన అతడిని వాగ్నర్ బోల్తా కొట్టించాడు. అనంతరం బ్యాటింగ్కు దిగిన అశ్విన్(27 బంతుల్లో 22 పరుగులు) ధాటిగా ఆడే ప్రయత్నం చేసి చివరికి స్లిప్స్లో దొరికిపోయాడు. చివర్లో వెంటవెంటనే వికెట్లు పడిపోయాయి.
